Ўзбекистон аҳолиси бир сутка ичида иккинчи бор ер қимирлашини ҳис қилди
Ўзбекистон аҳолиси бир суткада иккинчи бор ер қимирлашини ҳис қилди
Андижон вилоятининг тўртта тумани аҳолиси маркази Қирғизистонда бўлган зилзилани ҳис қилди. Ер силкинишлари 1 октябрь куни соат 13:17 да қайд этилди.
Республика Сейсмопрогностик мониторинг маркази хабарига кўра, магнитуда 4,3 ни, чуқурлик эса 10 километрни ташкил этган. Зилзила маркази Жалолободда жойлашган.
Ўзбекистон ҳудудида силкинишлар 2 балл кучида сезилди. Улар зилзила марказидан 68 километр узоқликдаги Хонабод туманида, 75 километр узоқликдаги Қўрғонтепа туманида, 80 километр узоқликдаги Пахтаобод туманида ва 88 километр узоқликдаги Жалақудуқ туманида қайд этилди. Тошкентгача бўлган масофа шимоли-шарқий йўналишда 333 километрни ташкил этади.
Шунингдек, Сурхондарё вилояти аҳолиси маркази Афғонистонда бўлган зилзилани ҳис қилгани хабар қилинган. Ер силкинишлари 1 октябрь куни соат 06:29 да содир бўлган.