Нью-Йоркнинг турли канализация тизимларидан одамлар сирли равишда чиқиб келаётгани кўрилганидан кейин икки киши ҳибсга олинди
Шаҳарда тунда одамларнинг канализация люкларидан чиқиб келиши билан боғлиқ бир қатор ҳолатлар кузатилди.
Нью-Йоркнинг турли канализация тизимларидан одамлар сирли равишда чиқиб келаётгани кўрилганидан кейин икки киши ҳибсга олинди
Нью-Йорк расмийлари чоршанба куни люкдан чиқиб, шаҳарнинг ер ости канализация тизимини тарк этаётгани кўрилган уч эркакдан иккисини ҳибсга олди.
Нью-Йорк полиция департаменти (NYPD) 26 ёшли Кевин Родригес ва 25 ёшли Сэмюэль Реверонни тил бириктириш ва ҳудудга ноқонуний киришда айблади.
Уч эркак Исроил Бош вазири Биньямин Нетаньяху Бирлашган Миллатлар Ташкилоти Бош Ассамблеяси доирасида қолиши режалаштирилган меҳмонхона яқинидаги люкдан чиқиб кетаётгани кузатилган.
НЙПД ББС'га берган баёнотида, бўрондан кейин одамлар қимматбаҳо буюмлар ва металл парчаларини қидириш учун канализация тизимига кирган бир нечта ҳолатларга гувоҳ бўлганини маълум қилди.
«Ушбу ҳодиса ҳам худди шу мезонга мос келади, бироқ БМТ Бош Ассамблеяси ва жойнинг нозиклигини ҳисобга олиб, хавфсизлик чораси сифатида NYPD федерал ҳамкорларимиз билан қўшимча хавфсизлик текширувларини ўтказмоқда», дейилади полиция департаменти баёнотида.
Квинс шаҳридан бўлган Родригес ва Реверон пайшанба куни ҳибсга олинди. Полициянинг маълум қилишича, чоршанба куни тахминан соат 16:30 да (EST) (Британия вақти билан 21:30) полиция чақирилганда, улар люкдан чиқиб, воқеа жойидан қочиб кетишган.
Жума куни эрталаб бўлиб ўтган суд мажлисида икки эркак ўз айбига иқрор бўлмади ва суд ҳужжатларига кўра, ҳибсдан озод қилинди.
Ушбу ҳибсга олишлар сўнгги ойларда шаҳарнинг турли қисмларида одамларнинг йўлкадаги люклардан чиқиб келаётгани кузатилган бир қатор ҳодисалардан кейин юз берди.
Август ойида кузатув камераси видеосида эрта тонгда Квинсдаги люкдан бир киши чиқиб келаётгани акс этган эди. Ўша ойда NYPD Пенн вокзали яқинидаги люкдан чиқиб кетаётгани кўрилган, махсус кийим ва бош чироқлари бўлган уч киши устидан тергов олиб борилаётганини маълум қилганди.
Май ойида кузатув камераси тасвирларида бир гуруҳ одамлар люк қопқоғини суриб, Бруклин жанубидаги канализацияга тушаётгани муҳрланган.
Расмийлар Нью-Йорк канализация тизимига кириш ҳам ноқонуний, ҳам хавфли эканини айтиб, ёпиқ ҳудудда заҳарли газлар ва сув тошиши хавфи борлигидан огоҳлантирган.
«Шу сабабларга кўра, жамоатчилик вакиллари ҳеч қачон қувур, дренаж, сув йиғувчи ҳавза, люк ёки чиқиш жойига кирмасликлари керак», деб маълум қилган шаҳар Атроф-муҳитни муҳофаза қилиш департаменти аввалроқ BBC'га.
Бу йил Манҳэттен марказида бир аёл машинаси эшигини очиб, тасодифан очиқ люкка тушиб кетиши оқибатида ҳалок бўлган эди.