Нью-Йорк дронлар ёрдамида эгизак минораларни қайта тиклаб, 11 сентябрь қурбонлари хотирасини ёд этди

Нью-Йоркда дронлар ёрдамида эгизак миноралар қайта тикланиб, 11 сентябрь қурбонлари хотираси ёдга олинди

Нью-Йоркда 2001 йил 11 сентябрдаги фожиали воқеаларнинг 25 йиллигига бағишланган «Нью-Йорк бандаргоҳи узра 2977 та олов» (2977 Lights Over New York Harbor) номли кенг кўламли хотира лойиҳаси бўлиб ўтди. Гудзон дарёси устидаги осмонда Жаҳон савдо маркази эгизак минораларининг ҳақиқий ҳажмдаги контурлари қайта тикланди.

Ёруғлик инсталляциясида 2977 та порловчи учувчисиз учиш аппаратидан фойдаланилди — АҚШ тарихидаги энг йирик террорчилик ҳужуми оқибатида ҳалок бўлган ҳар бир инсон хотираси учун биттадан аппарат ажратилди. Дронлар бандаргоҳ акваторияси узра ҳаракатчан юлдузлар туркумини ҳосил қилди, сўнгра вайрон бўлган осмонўпар биноларнинг таниқли силуэтлари кўринишида саф тортди.

Ёруғлик акцияси омон қолганлар, қурбонларнинг оилалари ва қутқарувчилар билан ҳамкорликда ташкил этилди.

Манхэттендаги расмий хотира маросимида Оқ уй вакили сифатида АҚШ вице-президенти Жей Ди Вэнс иштирок этади. Дональд Трамп эса ушбу санани Пентагонда ёдга олади: Нью-Йоркдаги мемориал ташкилотчилари хотира тадбирлари давомида сиёсий нутқ сўзлаш қатъиян тақиқланганини рўкач қилиб, унинг чиқиш қилиш ҳақидаги сўровини рад этишди.

2001 йил 11 сентябрда 19 нафар террорчи тўртта йўловчи самолётини эгаллаб олган эди. Улардан иккитаси Нью-Йоркдаги Жаҳон савдо маркази минораларига бориб урилган, учинчиси Вашингтондаги Пентагон биноси устига қулаган, тўртинчиси эса экипаж ва йўловчиларнинг қаршилик кўрсатишидан кейин Пенсильвания штатидаги далага қулаб тушган.