Нигериялик фуқаро етти кун давомида тўхтовсиз рақсга тушиб, жаҳон рекордини янгилашга ҳаракат қилмоқда
Бен Дансерни томоша қилиш учун Лагосда оломон йиғилди, у сешанба куни эрталабгача рақс тушишда давом этишини айтмоқда.
**Нигериялик эркак етти кун давомида тўхтовсиз рақсга тушиб, жаҳон рекордини янгилашга ҳаракат қилмоқда**
**Бен Дансер сешанба куни эрталаб ўз мақсадига эришиши кутилмоқда**
Нигериялик раққос янги жаҳон рекордини ўрнатиш мақсадида етти кун давомида тўхтовсиз рақсга тушишга ҳаракат қилмоқда.
Бен Дансер номи билан машҳур бўлган Бенжамин Даниэль 168 соат давомида рақсга тушишни мақсад қилган — бу энг узоқ давом этган яккахон рақс марафони бўйича амалдаги рекорддан 41 соатга кўпдир.
Гиннеснинг рекордлар китоби ушбу ҳаракат расмий рекорд сифатида ҳисобга олиниши ёки олинмаслиги ҳақида ҳозирча баёнот бермади. BBC ташкилотга изоҳ сўраб мурожаат қилди.
Сўнгги кунларда Лагосдаги Озодлик боғида (Freedom Park) ёшлар уни қўллаб-қувватлаш учун йиғилиб, унинг ҳар бир қадамини тасвирга олмоқдалар ва тўсиқлар ортида унга қўшилиб рақсга тушмоқдалар.
«Бу гўзал лаҳза. Унинг қанчалик узоқ йўлни босиб ўтганини кўриш ва бу муваффақиятга гувоҳ бўлиш мени жуда фахрлантирди ва Худога шукрона айтдим», — деди томошабинлардан бири Уче Анумуду BBC билан суҳбатда.
Амалдаги рекорд 127 соатни ташкил этади ва у 2023 йилда ўша пайтда 16 ёшда бўлган ҳиндистонлик раққоса Срушти Судхир Жагтап томонидан ўрнатилган. Унинг чиқиши асосан Ҳиндистоннинг асосий классик рақс услубларидан бири бўлган катакка асосланган эди.
33 ёшли Бен Дансер 18 йилдан бери профессионал раққос бўлиб ишлайди.
Унинг уриниши 22 сентябрь, сешанба куни бошланди ва агар у режалаштирилган 168 соатни якунласа, сешанба куни эрталаб ўз мақсадига эришиши кутилмоқда.
Марафоннинг катта қисмида Бен Дансер Нигериянинг бой рақс меросидан, шунингдек, тез ривожланаётган интернет маданиятидан илҳом олди.
Афробитс, шунингдек, фужи, жаз ва зук каби услублар доимий равишда янграб турди.
Чиқишни томоша қилиш учун одамлар оқими йиғилди
Вақти-вақти билан у рақс либосларини ечиб, Нигериянинг анъанавий кийимларини, жумладан, кенг агбада ва дашикини кийиб олди.
Нигерияда 250 дан ортиқ этник гуруҳлар мавжуд бўлиб, уларнинг ҳар бири кенг кўламли маданий анъаналарга эга.
Бен Дансернинг жамоаси ушбу чиқиш шунчаки унинг жисмоний чидамлилигини синаш эмас, балки ана шу хилма-хилликни акс эттиришга қаратилганини айтмоқда.
Унинг жамоасига кўра, у уринишдан олдин интенсив жисмоний тайёргарликдан ўтган, парҳезини мослаштирган ҳамда углеводлар ва кардио машғулотларга эътибор қаратган.
Марафон давомида у енгил таомлар тановул қилган ва суюқлик ичган, шу билан бирга, ҳар бир узлуксиз иш соати учун рухсат этилган беш дақиқалик дам олиш вақтидан фойдаланган.
Бен Дансер тўпланган дам олиш вақтидан фойдаланишдан олдин бир неча соат давомида кетма-кет рақсга тушишни афзал кўрди.
Зарур ҳолларда ёрдам бериш учун Озодлик боғида тиббий гуруҳ ҳам навбатчилик қилди.
Бен Дансерга ҳар соатда беш дақиқа дам олишга рухсат берилади
Унинг атрофидаги муҳит кўча байрамига айланиб кетди. Уни қўллаб-қувватлаш учун кўплаб ёшлар йиғилди.
Ушбу уриниш акс этган видеолар ижтимоий тармоқларда кенг тарқалиб, тадбир ўтказилаётган жойга янада кўпроқ одамларни жалб қилди.
Бен Дансерни қўллаб-қувватлаш учун бир неча бор келган Моронумубо Акоду унинг қатъиятига қойил қолганини, аммо жисмоний зўриқишдан хавотирда эканини айтди.
«Бу ҳақиқатан ҳам ақл бовар қилмайдиган иш, лекин мен у билан жуда фахрланаман», — деди у BBC билан суҳбатда.
Чиқишни икки марта томоша қилган Эммануэль Улелу раққоснинг энергиясида кескин ўзгаришни сезганини айтди.
«Иккинчи куни чарчоқ сезилиб турарди», — деди у.
«Ўзим ҳам ўша ерда атиги уч соат рақсга тушганимдан кейин, у қандай қилиб давом этаркин, деб ўйланиб қолдим».
Аммо бешинчи куннинг 16-соатида қайтиб келганида, у Бен Дансер аввалгидан кўра кучлироқ кўринганини айтди.
«Бу менга шуни эслатдики, агар бирор нарсани қанчалик хоҳлашимиз уни қўлга киритиш қийинчилигига мос келса ва ундан устун бўлса, биз ақл бовар қилмайдиган ишларни бажаришга қодирмиз», — деди у.
Нигерия, айниқса, кўнгилочар соҳада Гиннеснинг рекордлар китоби билан мустаҳкам алоқа ўрнатган.
2023 йилда нигериялик ошпаз Ҳилда Баси Лагосда 93 соат-у 11 дақиқа давомида тўхтовсиз таом тайёрлади ва Гиннес буни расман янги рекорд сифатида тан олди.
Унинг муваффақияти Нигерияда рекорд ўрнатишга бўлган қизиқиш тўлқинини келтириб чиқарди, гарчи ўшандан бери бошқалар унинг натижасидан ўзиб кетган бўлса-да.
Гиннес ташкилотининг маълум қилишича, унинг марафонидан кейин икки ой ичида мамлакатдан 1500 дан ортиқ янги аризалар келиб тушган, жумладан, китоб ўқиш, қўшиқ айтиш ва тўқиш бўйича рекорд ўрнатишга уринишлар бўлган.