Нидерландия собиқ вазирининг повербанки самолётда портлаб кетди

Нидерландиянинг собиқ вазирига тегишли повербанк самолётда портлаб кетди

Атлантика океани устидан учиб бораётган самолётда Нидерландиянинг собиқ транспорт вазири Камиел Эйрлингсга тегишли повербанк портлаб кетди ва бунинг натижасида бортда ёнғин чиқди. Шу сабаб экипаж самолётни фавқулодда тарзда ортга қайтаришга мажбур бўлди.

КЛМ авиакомпаниясига қарашли Боеинг Амстердамдан Кариб денгизининг жанубидаги Кюрасао оролига йўл олган эди.

Парвоз бошланганидан 5,5 соат ўтгач, самолёт Атлантика устидан учаётган пайтда бизнес-класс салонида повербанк ёниб кетди. Гувоҳларнинг айтишича, Эйрлингс қурилмани зарядлашга қўйган ва ўзи ухлаб қолган.

Авиакомпания қоидаларига кўра, парвоз вақтида повербанкдан фойдаланиш ёки уни қувватлаш тақиқланади. Экипаж ёнғинни тезда бартараф этди, бироқ самолёт командири хавфга бормасдан, Амстердамга қайтиш ҳақида буйруқ берди.

Маълумот учун, 53 ёшли Камиел Эйрлингс 2007—2010-йилларда Нидерландиянинг Транспорт, жамоат ишлари ва сув хўжалиги вазирлигини бошқарган. 2013–2014-йилларда эса у КЛМ авиакомпаниясига раҳбарлик қилган. Қизиғи, ҳодиса юз берган самолёт айнан шу авиакомпанияга тегишли.