New York Times раҳбари кекса қайнота-қайнонаси томонидан отиб ўлдирилгани айтилмоқда
Жонатан Маккинсининг ҳар иккиси 77 ёшда бўлган қайнота ва қайнонаси бир нечта айбловлар, жумладан, биринчи даражали қотиллик айблови билан юзма-юз келмоқда.
Нью-Йорк Таймс (The New York Times) раҳбари Калифорнияда ўлдирилди, у рафиқасининг кекса ота-онаси томонидан отиб ўлдирилганликда гумон қилинмоқда, улар қотилликда гумонланиб ҳибсга олинган.
Полициянинг маълум қилишича, шанба куни тушдан кейин Сан-Францискодан 35 миль (56 км) шарқда жойлашган Дублин шаҳридаги автотураргоҳда газетанинг ўйинлар бўлими муҳандислик директори, 40 ёшли Жонатан МакКинси кўплаб ўқ отиш жароҳатлари билан топилган.
Унинг қайнотаси ва қайнонаси — 77 ёшли Шоуёнг Жанг ва Шили Чен биринчи даражали қотилликни ўз ичига олган бир қанча айбловлар билан юзма-юз келмоқда.
Эр-хотиннинг адвокати бор-йўқлиги номаълум ва улар чоршанба куни расмий равишда айбловларга дуч келиш учун судда ҳозир бўлишлари керак.
Нью-Йорк Таймс МакКинсининг ўлимини тасдиқлади.
Полициянинг билдиришича, унинг жасади пайшанба куни тушдан кейин соат 15:00 да (Гринвич бўйича 23:00) Дублин спорт майдончаси ташқарисида топилган.
Гувоҳлар Сан-Францискодаги KGO-TV телеканалига ўқ овозларини эшитишганини ва шундан сўнг жабрланувчини ерда ётганини кўришганини айтишди.
«Мен йигитнинг ерга йиқилганини кўрдим: боши ва кўкраги қонга беланган эди», — деди гувоҳ Ассад Разави ахборот агентлигига.
Унинг қизи отаси эр-хотиннинг «бирга юрганини ва кейин отишма жойидан хотиржам узоқлашганини» кўрганини қўшимча қилди.
Гувоҳнинг сўзларига кўра, эр-хотин ҳужумдан кейин ҳудудда қолишган ва бир неча дақиқадан сўнг воқеа жойидан ўтиб кетаётган полиция ходими томонидан ҳибсга олинган.
Полиция МакКинси воқеа жойида вафот этганини маълум қилди.
Қотиллик сабаблари полиция томонидан ошкор этилмаган.
Кекса эр-хотин Санта-Рита қамоқхонасида сақланмоқда. Уларга шунингдек, жиноий тил бириктириш, ўқотар қуролдан қўпол эҳтиётсизлик билан қасддан ўқ узиш ва бола ҳаётини хавф остига қўйиш айбловлари қўйилган.