Нефт конлари бўйича Санеғга берилган лицензиялар бекор қилинган – Давактив раҳбари
Соҳибжон Муродов Ўзбекистондаги кўплаб нефт конлари қандай қилиб Санег тасарруфига ўтиб қолганига изоҳ берди ва корхонага берилган лицензиялар ҳозирда бекор қилинганини маълум қилди, чунки “конлар хўжалик айланмасига киритилмаган ва лицензия шартлари бажарилмаган”. Шунингдек, Фарғона нефтни қайта ишлаш заводи ҳам хусусийлаштириш тўлови вақтида тўланмагани учун Санеғдан қайтариб олинган.
Нефт конлари бўйича Санег'га берилган лицензиялар бекор қилинган – Давактив раҳбари
Давлат активларини бошқариш агентлиги директори Соҳибжон Муродов Ўзбекистондаги бир қатор нефт конларининг “Саноат энергетика гуруҳи” (Санег) тасарруфига қайси асосда ўтказилгани юзасидан изоҳ берди. Унинг айтишича, мазкур конларга берилган лицензиялар бекор қилинган.
8-октабр куни ўтказилган матбуот анжуманида Kun.uz мухбири мамлакатдаги стратегик аҳамиятга эга нефт конлари нега очиқ савдоларсиз хусусий компанияга берилгани ҳақида савол берди.
Муродовнинг тушунтиришича, нефт конларининг ўзи хусусийлаштирилмаган, Санег'га фақат ер қаъридан фойдаланиш ҳуқуқини берувчи лицензиялар тақдим этилган.
“Конларнинг ўзи хусусийлаштирилмайди, чунки улар табиий ресурс ҳисобланади. Бизда ер қаъридан фойдаланиш ҳуқуқи берилади, яъни лицензия ажратилади. Санег компаниясига ҳам айнан ер қаъридан фойдаланиш ҳуқуқини берувчи лицензиялар тақдим этилган. Бундай амалиёт бошқа компанияларда ҳам мавжуд”, - деди агентлик директори.
Соҳибжон Муродовнинг сўзларига кўра, аввал ер қаъридан фойдаланиш ҳуқуқини берувчи лицензияларни олиш тартиби ҳозиргидан бошқача бўлган. Вазирлар Маҳкамасининг 133-сон қарори билан тасдиқланган низомга мувофиқ, олдинги амалиётда ер қаъри участкасидан фойдаланиш учун биринчи бўлиб мурожаат қилган шахс белгиланган тўловларни амалга ошириш орқали лицензия олиши мумкин эди.
Кейинчалик бу тартиб ўзгартирилиб, углеводород конларидан фойдаланиш ҳуқуқини ауцион орқали бериш механизми жорий этилди.
“Аввалги амалиётда кон бўйича лицензия олиш учун биринчи мурожаат қилган шахс қонунчиликда белгиланган тўловни амалга ошириб, ер қаъридан фойдаланиш ҳуқуқини олиши мумкин эди.
Кейинчалик янги амалиёт киритилди. Углеводородлар бўйича ҳам лицензия бериш ҳуқуқи ауционга ўтказилди. Бу тартиб 2023–2024-йиллардан бошлаб жорий этилди. Унгача лицензияларни тўғридан тўғри олиш амалиёти мавжуд бўлган”, – деди Давактив раҳбари.
Унинг айтишича, ҳозирда бу лицензиялар бекор қилинган.
“Менга маълум бўлишича, лицензия олинган конлар хўжалик айланмасига киритилмагани ва лицензия шартлари бажарилмагани сабабли бугунги кунда бу лицензиялар бекор қилинган.
Ҳозир Геология вазирлиги томонидан ушбу конлардан самарали фойдаланиш бўйича чора-тадбирлар ишлаб чиқилмоқда”, – деди агентлик раҳбари.