Навоий ва Чирчиқ аҳолиси эксперимент доирасида даромадлари ва харажатларини декларация қилади
Ўзбекистонда Навоий ва Чирчиқнинг вояга етган аҳолиси, шунингдек, солиқ органлари ходимларининг йиллик даромадлари ва харажатларини декларация қилиш бўйича эксперимент йўлга қўйилади. Тартиб Вазирлар Маҳкамасининг 19 октябрдаги 574-сонли қарори билан тасдиқланган. Ҳужжатга кўра, иштирокчилар 2026 ва 2027 йиллар учун декларацияларни электрон солиқ хизматлари портали ёки Soliq мобил иловаси орқали топширишлари керак бўлади. 2026 йил учун маълумотларни топшириш муддати […]
Навоий ва Чирчиқ аҳолиси тажриба доирасида даромадлари ва харажатларини декларация қилади
Ўзбекистонда Навоий ва Чирчиқ шаҳарларининг вояга етган аҳолиси, шунингдек, солиқ органлари ходимларининг йиллик даромадлари ва харажатларини декларация қилиш бўйича тажриба бошланади. Тегишли тартиб Вазирлар Маҳкамасининг 19 октябрдаги 574-сонли қарори билан тасдиқланган.
Ҳужжатга кўра, иштирокчилар 2026 ва 2027 йиллар учун декларацияларни электрон солиқ хизматлари портали ёки Soliq мобил иловаси орқали топширишлари керак бўлади. 2026 йил учун маълумотларни тақдим этиш муддати 2027 йил 1 апрелгача, 2027 йил учун эса 2028 йил 1 апрелгача этиб белгиланган.
Навоий ва Чирчиқда тажриба доимий яшаш жойи бўйича рўйхатга олинган вояга етган фуқароларга тааллуқли бўлади. Талаблар тегишли ҳисобот йилида рўйхатдан ўтган жойида олти ойдан кам яшаган ёки солиқ органларида олти ойдан кам ишлаган шахсларга татбиқ этилмайди.
Декларацияларда иш ҳақи, мулкдан олинган даромадлар, моддий наф ва Солиқ кодексида назарда тутилган бошқа тушумларни кўрсатиш керак бўлади. «Электрон ҳукумат» тизими орқали олиш мумкин бўлган маълумотлар автоматик равишда юкланади.
Иштирокчиларнинг харажатлари давлат органлари маълумотлари, электрон ҳисоб-фактуралар ва Soliq’да рўйхатдан ўтказилган фискал чеклар асосида шакллантирилади. Roʻyxatga кўчмас мулк, автомобиллар, қимматбаҳо буюмлар, санъат асарлари, қимматли қоғозлар ва компаниялардаги улушларни харид қилиш, шунингдек, солиқлар, коммунал хизматлар ва кредитлар бўйича тўловлар киради.
Декларацияни топширишдан олдин иштирокчилар киритилган маълумотларни текширишлари, зарур ҳолларда уларга тузатиш киритишлари ва ҳужжатни назарда тутилган идентификация усули билан тасдиқлашлари керак бўлади. Агар хатоликлар аниқланса, аниқлаштирилган декларацияни топшириш мумкин. Солиқ органлари топшириш муддати яқинлашаётгани ҳақида камида бир ой олдин эслатишлари шарт.
Қарорда кўрсатилишича, тажриба якунлари бўйича аниқлаштирилган солиқ базасига қўшимча солиқлар ҳисобланмайди ва ҳуқуқий таъсир чоралари қўлланилмаслиги керак. Солиқ кодексининг 393-моддасида кўрсатилган даромадлар бундан мустасно. Олинган маълумотлар махфий бўлиб қолиши керак.
2028 йил 1 майга қадар Солиқ қўмитаси ҳукуматга тажриба якунлари ва ушбу амалиётни бутун мамлакат бўйлаб оммалаштириш мумкинлиги тўғрисида таклифлар киритиши керак.