НАТО бош котиби Европа ва Осиёда бир вақтнинг ўзида инқирозлар юзага келиши хавфидан огоҳлантирди

НАТО Бош котиби Марк Рютте Хитойнинг Тайванга қарши ҳарбий ҳаракатлари содир бўлган тақдирда, Россия Ғарб давлатларининг эътиборини бўлиш учун Европадаги вазиятни беқарорлаштириши мумкинлиги ҳақидаги сценарий эҳтимолидан огоҳлантирди. Унинг сўзларига кўра, воқеаларнинг бундай ривожланиши альянсдан бир вақтнинг ўзида иккита стратегик йўналишда ҳаракат қилишга тайёр бўлишни талаб қилади.

Германия дипломатик ваколатхоналари раҳбарларининг конференциясида сўзлаган Рютте Евроатлантика минтақасида Россия томонидан бўлаётган таҳдидлар ва Ҳинд-Тинч океани минтақасидаги потенциал можаро ўзаро узвий боғлиқлигини таъкидлади. Агар Пекин Тайванга нисбатан чоралар кўрса, у АҚШ ва Европа давлатларининг ресурсларини чалғитиш учун Европада кескинликни юзага келтириш мақсадида Россия раҳбариятини ишга солиши мумкин.

Ташкилот раҳбари Вашингтон ҳарбий ресурсларини бир нечта стратегик ҳудудлар, жумладан, Европа, ғарбий ярим шар ва Тинч океани ўртасида тақсимлашга мажбур эканлигини таъкидлади. Шу боис, Европа давлатлари ўз хавфсизлиги учун кўпроқ масъулиятни ўз зиммасига олишлари ва Америка кучлари бошқа йўналишга йўналтирилганда юзага келиши мумкин бўлган бўшлиқларни тўлдириш учун мудофаа салоҳиятини оширишлари зарур.

Рютте, шунингдек, НАТОнинг Ҳинд-Тинч океани минтақасидаги ҳамкорлари, масалан, Япония, Жанубий Корея, Австралия ва Янги Зеландия билан ҳамкорлигининг эҳтимолий кучайиши жамоавий мудофаа кафолатларининг Тайванга татбиқ этилишини англатмаслигини аниқлаштирди. Альянс ўз хавфсизлигини режалаштиришда Москва, Пекин, Пхеньян ва Теҳрон ўртасидаги ўсиб бораётган ҳамкорликни ҳисобга олган ҳолда, Россияни ҳамон узоқ муддатли асосий таҳдид сифатида кўрмоқда.

Бундан аввал Европа комиссияси раҳбари Урсула фон дер Ляйен Иттифоққа аъзо давлатлар ва ҳамкор мамлакатлар етакчилари иштирокида Европа хавфсизлик кенгашини ташкил этишни таклиф қилган эди. У тегишли ташаббус билан Европарламентга йиллик мурожаати чоғида чиқиш қилди.