Наманганда собиқ хотинини боғча ётоқхонасида пичоқлаган эркак 10 йилга қамалди
Эркак собиқ хотинига яна бирга яшашни таклиф қилган. Аёл рад жавобини бергач, уни боғчанинг болалар ётоқхонасида уч марта пичоқлаган. Ёрдамчи тарбиячи бўлиб ишлаган аёлнинг ҳаёти шифокорлар ёрдамида сақлаб қолинган.
Наманганда собиқ хотинини боғча ётоқхонасида пичоқлаган эркак 10 йилга қамалди
Наманган вилояти Поп туманида ярашишни истамаган собиқ хотинини боғча ётоқхонасида пичоқлаб, ўлдиришга уринган 32 ёшли эркак 10 йилга озодликдан маҳрум этилди.
“Дарё” танишган суд ҳужжатига кўра, ҳодиса 2026-йил 16-апрел куни тумандаги давлат боғчаларидан бирида юз берган. Ўша куни Б.А. ёрдамчи тарбиячи сифатида ишлайдиган собиқ рафиқаси С.B.ning иш жойига борган.
Улар 2023-йилда шаръий никоҳ асосида турмуш қурган ва бир фарзандли бўлган. Кейинчалик оилавий келишмовчиликлар сабаб аёл ота-онасининг уйига кетиб қолган. Эркакнинг айтишича, у бир неча бор яна бирга яшашни таклиф қилган, аммо аёл бунга рози бўлмаган.
С.B.ning айтишича, воқеа содир бўлган куни эрталаб собиқ эри қўнғироқ қилиб, учрашиб гаплашишни сўраган. Аёл ишда эканини, ўғлини кўрмоқчи бўлса, уйдан олиб кетиши мумкинлигини айтган. Шундан кейин эркак боғчага келган.
Аёл уни кўриб, қочиш учун болалар ётоқхонаси томон юрган. Бироқ Б.А. унинг ортидан етиб бориб, билагини қайирган ва каравотга итариб юборган. Сўнг яна бирга яшашни таклиф қилган. Рад жавобини эшитгач, ўзи билан олиб келган пичоқни аёлнинг қорнига уч марта санчган.
С.Б. шундан сўнг бирга яшашга розилигини билдирган ва Б.А. ташқарига чиқиб кетган. Воқеадан хабар топган ҳамкасблари тез ёрдам чақирган. Аёл шифохонага олиб борилган ва шифокорлар унинг ҳаётини сақлаб қолган. С.Б. судда соғлиғи яхшиланганини, судланувчига нисбатан даъвоси йўқлигини билдирган.
Боғча тарбиячисининг айтишича, ўша пайтда болалар бошқа хонада машғулотда бўлган ва ҳодисани кўрмаган. Қоровул эса эркак боғчага қўшимча дарвозадан кирганини маълум қилган.
“Воқеа содир бўлган кун ўғлимнинг туғилган куни эди. Шу сабабли Чустдаги бозордан унга ўйинчоқ машина, пайпоқ ва футболка сотиб олдим. Бозор айланиб юрганимда чиройли пичоққа кўзим тушди. Уни Россиядаги раҳбаримга совға қилиш учун олгандим. Бозордан аёлимнинг уйига борсам, ҳеч ким йўқ экан. Шундан кейин боғчага бордим. У ерда иккимиз болани кўриш масаласида тортишиб қолдик. Жаҳл устида пичоқ тортдим ва ташқарига чиққач, уни ташлаб юбордим”, дея кўрсатма берган Б.А.
Жиноят ишлари бўйича Поп тумани судининг ҳукмига кўра, Б.А. Жиноят кодексининг 25, 97-моддаси 1-қисми билан (Қасддан одам ўлдириш) айбли деб топилиб, унга 10 йил озодликдан маҳрум қилиш жазоси тайинланган.