Наманган вилоятида 254,5 минг тонна пахта йиғиб олиш режалаштирилмоқда
Наманган вилоятида 48,8 минг гектар майдонга ғўза экилди. Терим кампаниясига 178 та машина, жумладан 57 та янги агрегат жалб этилади.
Наманган вилоятида 254,5 минг тонна пахта йиғиб олиш режалаштирилмоқда
Наманган вилоятида 2026 йилги хом ашё пахта ҳосилини йиғиб-териб олишга тайёргарлик бошланди.
Жорий мавсумда ғўза 48,8 минг гектар майдонга жойлаштирилди, ўртача ҳосилдорлик эса, режаларга кўра, гектарига 52,2 центнерни ташкил этиши керак. Бу ҳақда Наманган вилояти ҳокимлиги ахборот хизмати хабар бермоқда.
Бундай кўрсаткичлар билан ҳудудда умумий ҳосил ҳажмини 254,5 минг тоннага етказиш кўзда тутилган. Ҳозирда далаларда кўсакларнинг оммавий очилиши бошланди, бу эса йиғим-терим кампаниясининг асосий босқичи яқинлашаётганидан далолат беради.
Ишларни ташкил этиш учун вилоятда 856 та терим отряди шакллантирилди. Бу йил асосий эътибор механизациялашган теримга қаратилган: пахта териш техникаси ёрдамида ҳосилнинг 70 фоизини йиғиб олиш режалаштирилган.
Кампанияга жами 178 та пахта териш агрегатини жалб этиш кўзда тутилган. Шу билан бирга, жорий йилда ҳудуднинг техника парки 57 та янги машина билан бойиди.
Йиғим-теримга тайёргарлик масалалари Мингбулоқ туманидаги «Элита уруғчилик» фермер хўжалиги дала шийпонида бўлиб ўтган вилоят кўргазмали семинар-йиғилишида муҳокама қилинди. Тадбирда қишлоқ хўжалиги фахрийлари, оқсоқоллар, вилоят ҳуқуқ-тартибот идоралари раҳбарлари, туман ҳокимлари ва соҳавий ташкилотлар вакиллари иштирок этди.
Семинарда асосий эътибор йиғим-терим пайтида исрофгарчиликни камайтириш, белгиланган муддатларга риоя қилиш, хавфсизлик талаблари ва кампаниянинг барча босқичларини тизимли ташкил этишга қаратилди. Учрашув якунлари бўйича йиғим-терим ишларини қисқа муддатларда ўтказишга қаратилган чора-тадбирлар белгилаб олинди.
Наманган вилояти ҳокими Шавкатжон Абдураззоқов мутасаддиларга пахтани далалардан ўз вақтида йиғиб олишни таъминлаш, теримчилар учун зарур шароитлар яратиш ва белгиланган режа кўрсаткичлари бажарилишини ташкил этиш бўйича топшириқлар берди.
Йиғим-терим кампаниясининг бошланиши, шунингдек, оқсоқоллар иштирокидаги анъанавий тадбир билан ҳамроҳлик қилди: жонлиқ сўйилиб, дастурхон ёзилди.
Иштирокчилар деҳқон ва фермерларнинг ризқ-рўзига барака тилаб дуолар қилишди ва янги мавсум бошланишига оқ фотиҳа беришди.