Наманган вилояти Gamma Meccanica компанияси билан 105 млн долларлик шартнома имзолади
Шавкатжон Абдураззоков бошчилигидаги Наманган вилояти делегацияси Италиянинг Gamma Meccanica компанияси билан музокаралар ўтказди. Томонлар 105 миллион долларлик инвестиция битимини туздилар.
Наманган вилояти Италиянинг Gamma Meccanica компанияси билан 105 миллион долларлик инвестиция шартномасини имзолади.
Ҳужжат вилоят ҳокими Шавкатжон Абдураззоқов бошчилигидаги делегациянинг Италияга амалий ташрифи доирасида корхона раҳбарияти билан ўтказилган музокаралар якуни бўйича имзоланди.
Сафар давомида делегация саноат ускуналарини ишлаб чиқаришга ихтисослашган Gamma Meccanica компаниясининг ишлаб чиқариш қувватлари ва технологиялари билан танишди.
Компания 1977 йилда ташкил этилган. Унинг бош қароргоҳи ва асосий ишлаб чиқариш майдони Эмилия-Романья вилоятининг Биббиано шаҳрида жойлашган. Gamma Meccanica биноларни иссиқлик изоляцияси учун қўлланиладиган минерал пахта ва XPS-панеллар ишлаб чиқариш технологик тармоқларини, шунингдек, пластик чиқиндиларни қайта ишлаш ускуналарини ишлаб чиқаради.
Компания президенти Андреа Бурини билан ўтказилган учрашувда томонлар Наманган вилоятида саноат ишлаб чиқаришини ривожлантириш истиқболлари, энергия тежовчи технологияларни жорий этиш ва пластик чиқиндиларни қайта ишлаш соҳасида қўшма лойиҳаларни амалга оширишни муҳокама қилдилар.
Инвестициявий ҳамкорлик масалалари ва компания технологияларини вилоят саноат секторида қўллаш имкониятлари алоҳида кўриб чиқилди.
Музокаралар якуни бўйича томонлар 105 миллион долларлик инвестиция шартномасини имзоладилар. Шу билан бирга, хабарда лойиҳани амалга ошириш муддатлари, унинг ишлаб чиқариш параметрлари ва инвестицияларнинг тақсимланишига аниқлик киритилмаган.