Наманган ва Фарғона вилоятларида 24 килограмм гашиш мусодара қилинди. Видео

2 соат олдин

Наманган ва Фарғона вилоятларида ҳуқуқ-тартибот идоралари ходимлари 24 килограмм гашиш сотилишининг олдини олишди. ИИВ маълумотларига кўра, иштирокчилардан бири 20 килограмм гиёҳвандлик моддасини қўшни давлат ҳудудидан Норин дарёси орқали олиб ўтган.

Наманган вилоятининг чегараолди ҳудудида Андижон вилоятида яшовчи 33 ёшли фуқаро қўлга олинди. ИИВ хабарига кўра, у дарё орқали ичида гашиш бўлган сумкани олиб ўтиб, чегарадан тахминан 20 метр узоқликдаги дарахтлар тагида қолдирган. Гиёҳвандлик моддалари эркакнинг Андижон ва Наманган вилоятларидаги шериклари учун мўлжалланган эди.

Шундан сўнг, гуруҳнинг бошқа аъзоларини қўлга олиш учун тезкор тадбир давом эттирилди. Кейинроқ Андижонда 50 ёшли эркак аввалроқ топилган гашиш туркумидан 10 килограммини қабул қилиб олаётган вақтда ушланди.

Яна бир тезкор тадбир Қўқон шаҳрида ўтказилиб, унда бир эркак гашишни 24 минг долларга сотишга уринган вақтида қўлга олинди. Бешариқ туманида эса ҳуқуқ-тартибот идоралари ходимлари тўртта ўрамга қадоқланган яна тўрт килограмм гашишни сотаётган 35 ёшли гумонланувчини ушлашди. Натижада, тарқатилишининг олди олинган гиёҳвандлик моддасининг умумий ҳажми 24 килограммни ташкил этди.

Ушбу ҳолатлар бўйича 246-модда ("Гиёҳвандлик воситаларини кўп миқдорда контрабанда қилиш") ва 273-модда ("Гиёҳвандлик воситаларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш") билан жиноят ишлари қўзғатилган. Биринчи моддада 10 йилдан 20 йилгача, иккинчи моддада эса 15 йилдан 20 йилгача озодликдан маҳрум қилиш жазоси назарда тутилган. Барча айбланувчилар қамоққа олинган.