Нагоя-2026: учинчи кун ўзбекистонлик спортчиларга учта кумуш медаль келтирди
Япониядаги Осиё ўйинларининг учинчи мусобақа кунининг асосий натижаси аралаш жанг санъатлари ва ушу бўйича қўлга киритилган учта кумуш медаль бўлди.
Нагоя-2026: учинчи кун ўзбекистонлик спортчиларга учта кумуш медаль келтирди
22 сентябрь куни Аичи ва Нагояда ўтаётган 2026 йилги Осиё ўйинларида Ўзбекистон вакиллари спортнинг 15 турида иштирок этишди. Мусобақанинг учинчи куни якунларига кўра, ММА ва ушу бўйича учта кумуш медаль қўлга киритилди. Бундан ташқари, футбол бўйича олимпия терма жамоаси гуруҳ босқичини максимал натижа билан якунлади.
Ўзбекистон аралаш яккакурашларда бирданига иккита медални қўлга киритди
Фирдавс Отамуродов 60 кг гача бўлган вазн тоифасида замонавий йўналишда кумуш медални қўлга киритди. Финалда ўзбекистонлик жангчи Тожикистон вакили Мирзобек Умаров билан тўқнаш келди ва 0:3 ҳисобида имкониятни бой берди.
Аёллар ўртасидаги ММА турнирида яна бир кумуш медални Ҳилола Собирова қўлга киритди. У 60 кг гача бўлган вазн тоифасида анъанавий йўналиш финалида сингапурлик Тео Хуэй Хунга имкониятни бой берди.
Куннинг учинчи кумушини Дарья Латышева келтирди. Ушу бўйича нансюань ва нандао йўналишларидаги мусобақаларда ўзбекистонлик спортчи 19,413 балл жамғариб, иккинчи ўринни эгаллади. Ушбу медаль Латышева учун фаолиятидаги Осиё ўйинларининг учинчи соврини бўлди.
Футболчилар кетма-кет учинчи ғалабани қўлга киритишди
Ўзбекистон олимпия терма жамоаси футбол турнирининг гуруҳ босқичини Вьетнам устидан қозонилган ғалаба билан якунлади — 2:0.
Равшан Ҳайдаров шогирдлари гуруҳ босқичини мукаммал кўрсаткич билан якунлашди — 3 та ўйинда 3 та ғалаба ва 9 очко. Чорак финалда ўзбекистонликлар 25 сентябрь куни Саудия Арабистонига қарши майдонга тушади.