Мюллер, Ҳуммелс ва Ян Зоммер Португалия клубини сотиб олди
Мюллер, Ҳуммелс ва Ян Зоммер Португалия клубини сотиб олди
Жаҳон чемпионлари Томас Мюллер ва Мац Ҳуммелс, шунингдек, швейсариялик дарвозабон Ян Зоммер каби таниқли футболчилардан ташкил топган инвесторлар гуруҳи Португалиянинг “Эштрела да Амадора” футбол клубининг 90 фоиз аксиясини 40 миллион еврога сотиб олди. СНН Португал нашрининг хабар беришича, бу келишув Португалия футболи тарихидаги клуб аксияларининг энг қиммат савдоси бўлди.
Қизиқарли жиҳати шундаки, жамоанинг аввалги эгаси Пауло Лопу ушбу клубни 2020-йилнинг июл ойида, жамоа ҳали учинчи дивизионда ўйнаётган пайтда атиги 72 минг еврога харид қилган эди. 2023/24-йилги мавсумга келиб эса жамоа юқори дивизион — Примейрага қайтишга муваффақ бўлди.
Янги келишувдан сўнг, шу пайтгача президент бўлиб келган Пауло Лопу ўз лавозимини тарк этади, бироқ унинг ўғли Франсишку Лопу бош директор лавозимида қолади. Шуни ҳам таъкидлаш керакки, жамоа айни пайтда молиявий қийинчиликларни бошидан кечирмоқда. Хусусан, 2026-йилнинг май ойида “Эштрела” 25 миллион евродан ортиқ қарзини тўлаш шартларини енгиллаштиришни сўраб судга мурожаат қилган.
Эслатиб ўтамиз, жамоанинг янги хўжайинлари футбол оламида жуда катта ютуқларга эришган. Томас Мюллер 13 карра Германия чемпиони ва икки бор ЙЧЛ ғолиби, қолаверса, 2014-йилги Жаҳон чемпиони ҳисобланади. Унинг терма жамоадаги собиқ шериги Мац Ҳуммелс ҳам худди шу мундиалда зафар қучган ҳамда фаолияти давомида беш бор Бундеслига чемпиони бўлган. Ўз навбатида, Швейсария миллий терма жамоаси посбони Ян Зоммер ҳам ўз вақтида Германия ва Италия чемпионлигини қўлга киритишга улгурган.