Миссисипи штатида қора танли ўсмирнинг ўлими бўйича ҳеч кимга жиноий айблов қўйилмайди, дейди ҳакамлар ҳайъати
Нолан Уэллснинг оиласи у «уч нафар ёш оқ танли эркак билан қайиқда кетганидан кейин» вафот этгани ҳақида ташвиш билдирган эди.
Миссисипилик қора танли ўсмирнинг ўлими бўйича ҳеч кимга жиноий айблов қўйилмайди, дейди ҳакамлар ҳайъати
Катта ҳакамлар ҳайъати (grand jury) 4 июль куни дўстлари билан қайиқда сайрга чиққанидан икки кун ўтиб ўлик ҳолда топилган миссисипилик ўсмирнинг ўлими бўйича ҳеч кимга нисбатан жиноий айблов қўймайди.
Оила томонидан ёлланган фуқаролик ҳуқуқлари бўйича адвокат Бен Крамп қора танли Нолан Уэллснинг «уч нафар оқ танли йигит билан қайиқда айланишга чиққанидан кейин вафот этгани» ва гувоҳларнинг кўрсатмалари бир-бирига зид келганидан хавотир билдирган эди.
Жексон округи прокурори Энжел Майерс МакИлратнинг айтишича, катта ҳакамлар ҳайъати Уэллснинг ўлимида бирор кимга жиноий айблов қўйиш учун далиллар етарли эмас деб топган.
АҚШ ОАВларига берган баёнотида Крамп катта ҳакамлар ҳайъатининг хулосаси «жавоблардан кўра кўпроқ саволларни қолдирганини» айтди.
«Ноланнинг оиласи унга нима бўлганини билмагунимизча тинчимайди, биз ҳам тўхтамаймиз», деди у.
Полиция Уэллснинг тасодифан чўкиб кетганини айтган бўлса, унинг дўстлари қайиқдаги муаммо туфайли эртароқ қайтишга қарор қилишганида, у Хорн оролида қолишни афзал кўрганини билдиришган.
Душанба куни округ прокурорининг ижтимоий тармоқларида эълон қилинган катта ҳакамлар ҳайъати ҳисоботида «жаноб Уэллс жасадининг ҳолати, топилган вақти ва жойи чўкиш ҳолатига мос келиши» аниқланган.
«Ноланнинг ўлими ва ғойиб бўлиши ирқий сабабларга кўра содир бўлган деган даъволарни тасдиқловчи ҳеч қандай далил йўқ», деди Майерс МакИлрат видеомурожаатида.
Ҳисоботга кўра, 25 нафар катта ҳакамлар ҳайъати аъзоси 43 нафар гувоҳнинг, жумладан, Уэллснинг оиласи томонидан мустақил экспертиза ўтказиш учун ёлланган суд-тиббиёт экспертининг кўрсатмаларини тинглаган.
«Катта ҳакамлар ҳайъати 2026 йил 4 июль куни Хорн оролига борган ёки у ердан қайтган бирор бир шахснинг жаноб Уэллснинг ўлими билан боғлиқ жиноий ҳаракатлар содир этгани тўғрисидаги оммавий даъволарни тасдиқловчи ишончли далил топмади», дейилади ҳисоботда.
Ҳисоботда айтилишича, Уэлс билан бирга бўлганлар тергов билан тўлиқ ҳамкорлик қилишган ва GPS қурилмалари, кузатув камералари тасвирлари, уяли телефонлар ва бошқа далилларни тақдим этишган.
Шунингдек, гавжум байрам кунларида Хорн оролига келган меҳмонларнинг келган қайиқларидан бошқа қайиқларда қолиши ва кетиши одатий ҳол экани қайд этилган.
Жануби-Ғарбий Миссисипи жамоат коллежида америкача футбол ўйнаган ва мураббийи томонидан «қувноқ ва беғам бола» деб таърифланган Уэллснинг онаси Кристин Уонсли биринчи бўлиб ўғлининг 4 июль куни кечқурун қайтмаганидан кейин ғойиб бўлгани ҳақида бонг урган.
Маҳаллий, штат ва федерал идоралар иштирокидаги қидирув ишларидан сўнг, расмийлар унинг жасадини 6 июль куни орол қирғоқлари яқинидан топишган.