Миср Ўзбекистонда янги ерларни ўзлаштиришда қатнашмоқчи
Мисрнинг олтита компанияси Ўзбекистонда суғориш тизимларини жорий этиш, чорвачиликни ривожлантириш ва қишлоқ хўжалиги маҳсулотларини экспортга етиштириш бўйича қўшма лойиҳаларга қизиқиш билдирди. Аниқ таклифларни ишлаб чиқиш учун яқин кунларда мисрлик мутахассисларнинг Ўзбекистонга ташрифини ташкил этишга келишилди.
Миср Ўзбекистонда янги ерларни ўзлаштиришда иштирок этишни истамоқда
«Дунё» ахборот агентлиги хабарига кўра, Ўзбекистон дипломатлари билан бўлиб ўтган учрашувда Фамот, Делта, Модерн Фарминг, СОБЕК, Фруиц ва Пуреланд компаниялари вакиллари қатнашган.
Музокараларда қишлоқ хўжалиги, чорвачилик, суғориш ҳамда янги ерларни ўзлаштириш йўналишларидаги ҳамкорлик истиқболлари муҳокама қилинган.
Миср томони айлана суғориш тизимлари — пивотларни жорий этиш, чорвачилик учун озуқа базасини яратиш ва қишлоқ хўжалиги маҳсулотларини етиштириш бўйича қўшма лойиҳаларни ишлаб чиқишга тайёрлигини билдирган. Етиштирилган маҳсулотларни кейинчалик экспорт қилишни ташкил этиш масаласи ҳам кўриб чиқилган.
Компаниялар Ўзбекистон ҳудудларида янги ерларни ўзлаштириш ва қишлоқ хўжалигини ривожлантиришга доир лойиҳаларда қатнашиш истагини билдирган.
Учрашув якунида ҳамкорлик имкониятларини жойида ўрганиш ва аниқ лойиҳаларни тайёрлаш мақсадида Миср мутахассисларининг Ўзбекистонга ташрифини ташкил этиш юзасидан келишувга эришилган.