Мирзиёев ва Вучич муносабатларнинг янги босқичини муҳокама қилдилар

Мирзиёев ва Вучич муносабатларнинг янги босқичини муҳокама қилдилар

Ўзбекистон Президенти Шавкат Мирзиёев ва Сербия Президенти Александр Вучич Белградда «тет-а-тет» форматида ҳамда расмий делегациялар иштирокида музокаралар ўтказдилар.

Томонлар икки мамлакат ўртасидаги сиёсий, савдо-иқтисодий, инвестициявий ва гуманитар ҳамкорликни янада ривожлантириш масалаларини кўриб чиқдилар.

Учрашув аввалида Мирзиёев Сербия етакчисига самимий қабул ва меҳмондўстлик учун миннатдорлик билдирди. У Ўзбекистон Президентининг Белградга илк ташрифи икки давлат ўртасидаги муносабатларда янги босқичнинг бошланиши бўлишини таъкидлади.

Музокара иштирокчилари сиёсий мулоқот, парламентлараро алоқалар, савдо-иқтисодий ҳамкорлик, шунингдек, ишбилармонлик ва гуманитар алмашинувлар фаоллашганини қайд этдилар. Дипломатик ваколатхоналарнинг очилиши ва парламентлараро форумнинг ташкил этилиши муносабатларни янада чуқурлаштириш йўлидаги муҳим қадам сифатида тилга олинди.

Президентлар савдо ва инвестицияларга алоҳида эътибор қаратдилар. Йил бошидан буён юқори даражали делегациялар иштирокида бир нечта иқтисодий тадбирлар бўлиб ўтди. Музокаралар арафасида Ҳукуматлараро комиссиянинг биринчи йиғилиши бўлиб ўтди, 8 сентябрь куни эса икки мамлакатнинг етакчи компаниялари иштирокида Ўзбекистон-Сербия бизнес-форуми режалаштирилган.

Музокаралар давомида томонлар ўзаро савдо ҳажмини ошириш, жумладан, харидоргир товарлар етказиб беришни кенгайтириш ҳисобига кўпайтиришни муҳокама қилдилар. Бунинг учун эркин савдо тўғрисидаги битимни ишлаб чиқиш ва қабул қилиш, стандартлаштириш соҳасидаги ҳамкорликни кучайтириш ҳамда ўзаро кўргазмалар ташкил этиш таклиф этилмоқда.

Ўзбекистон, шунингдек, Белграддаги «ЭКСПО-2027» халқаро кўргазмасида фаол иштирок этиш ниятида. Келаси йили мамлакат ушбу тадбирда миллий павильонини тақдим этади.

Президентлар транспорт ва логистика соҳаларида, енгил ва озиқ-овқат саноатида, қишлоқ хўжалиги, фармацевтика, тиббиёт ва рақамли иқтисодиётда янги қўшма лойиҳалар истиқболларини кўриб чиқдилар. Автокомпонентлар, ускуналар, электротехника ва электрон маҳсулотлар ишлаб чиқариш бўйича саноат кооперациясида катта салоҳият мавжудлиги қайд этилди.

Келишувларни амалга ошириш учун 2026–2028 йилларга мўлжалланган Саноат шериклигини ривожлантириш бўйича қўшма Ҳаракатлар режаси қабул қилинди.

Етакчилар ҳудудлараро алоқаларни кенгайтириш муҳимлигини ҳам таъкидладилар. Улар Самарқанд вилояти ва Воеводина, шунингдек, Самарқанд ва Нови-Сад шаҳарлари ўртасида тўғридан-тўғри алоқалар ўрнатилганини олқишладилар.

Гуманитар соҳада томонлар таълим, маданият, спорт ва туризм соҳаларида ҳамкорликни ривожлантиришга келишиб олдилар. Хусусан, Маданият кунларини, қўшма кино, театр ва мусиқа фестивалларини ўтказиш, шунингдек, спорт федерациялари ўртасидаги тўғридан-тўғри алоқаларни кенгайтириш режалаштирилмоқда.

Музокараларнинг алоҳида мавзуси уюшган меҳнат миграцияси бўлди. Сербия ушбу соҳадаги тизимли ҳамкорликка юқори қизиқиш билдирди. Ташриф якунлари бўйича томонлар мобиллик ва меҳнат миграцияси тўғрисидаги битимнинг қабул қилинишини олқишладилар.

Мирзиёев ва Вучич, шунингдек, минтақавий ва халқаро кун тартиби юзасидан фикр алмашдилар ҳамда кўп томонлама майдонларда ўзаро қўллаб-қувватлашни тасдиқладилар.

Эришилган келишувларни ўз вақтида бажариш, шунингдек, қабул қилинган қарор ва битимларни амалга ошириш учун кенг қамровли «йўл харитаси» ишлаб чиқилади.