Мирзиёев Бухорода Beeline’нинг 40 млн долларлик дата-марказини ишга туширди
Beeline Uzbekistan’нинг Кагон туманидаги янги дата-маркази операторнинг резерв инфраструктурасининг бир қисмига айланади. Лойиҳа $40 млн хусусий инвестициялар ҳисобига амалга оширилди.
Мирзиёев Бухорода Beeline’нинг $40 млнлик дата-марказини ишга туширди
Ўзбекистон Президенти Шавкат Мирзиёев Бухоро вилоятида Beeline Uzbekistan’нинг янги маълумотларни қайта ишлаш маркази фаолиятига старт берди. Лойиҳага киритилган хусусий инвестициялар ҳажми $40 млнни ташкил этди.
Объект Когон туманида Beeline Uzbekistan ҳамда Рақамли технологиялар вазирлигининг қўшма лойиҳаси доирасида барпо этилди.
У операторнинг ҳудудий тақсимланган захира инфратузилмаси таркибига киради ҳамда миллионлаб фойдаланувчилар учун рақамли хизматларнинг ишончлилиги ва узлуксиз ишлашини оширишга қаратилади.
Лойиҳа кейинчалик кенгайтиришга мўлжалланган. Унинг ҳужжатлари Uptime Institute халқаро ташкилоти томонидан Tier III Certification of Design Documents (TCDD) сертификатини олди. Ушбу сертификатлаш лойиҳа ечимларининг дата-марказнинг ишончлилиги ва хатоликларга чидамлилиги талабларига мувофиқлигини тасдиқлайди.
VEON маълумотларига кўра, 20 йиллик фаолияти давомида гуруҳ Ўзбекистон иқтисодиётига 1,8 млрд долларга яқин сармоя киритди. Ушбу маблағларнинг салмоқли қисми мамлакатга охирги ўн йилликда йўналтирилди.
Маълумотларни қайта ишлаш маркази қурилишидан ташқари, Perfectum’нинг $207 млнга сотиб олиниши компаниянинг йирик инвестициявий қадамларидан бири бўлди.
Beeline Uzbekistan бош директори Евгений Настрадин янги объектнинг ишга туширилиши ва Perfectum’нинг сотиб олиниши гуруҳнинг Ўзбекистон бозоридаги узоқ муддатли режаларини акс эттиришини таъкидлади.
Унинг сўзларига кўра, компания бундан кейин ҳам рақамли инфратузилмани ривожлантиришга сармоя киритиш ва мамлакатнинг рақамли трансформациясида иштирок этиш ниятида.
Дата-марказнинг Тошкентдан ташқарида жойлаштирилиши, шунингдек, замонавий рақамли инфратузилма географиясини кенгайтиради.
Компания таъкидлаганидек, лойиҳа «Рақамли Ўзбекистон — 2030» стратегияси вазифаларига мос келади ҳамда рақамли хизматларни, шу жумладан сунъий интеллектга асосланган ечимларни ривожлантириш учун қўшимча имкониятлар очади.