Миграция агентлиги кўмаги билан 4,4 мингдан ортиқ ўзбекистонлик Россиядан ватанига қайтди
Миграция агентлиги кўмагида 4,4 мингдан ортиқ ўзбекистонлик Россиядан ватанига қайтди
Сентябрь ойида Ўзбекистон Миграция агентлигининг Россиядаги ваколатхонаси 4,4 мингдан ортиқ ватандошга ватанига қайтишга ёрдам берди. Фуқароларга, шунингдек, 6 мингга яқин ҳуқуқий маслаҳатлар берилди, бир қатор ҳолларда эса вақтинчалик турар жой, тиббий хизматлар ва адвокатлар меҳнати ҳақи тўлаб берилди.
Агентлик маълумотларига кўра, ой давомида 983 киши бир марталик моддий ёрдам олди. 409 та ҳолатда вақтинчалик яшаш ва иш жойи харажатлари қоплаб берилди, яна 171 та ҳолатда адвокатлар ва бошқа ташкилотлар хизматлари учун ҳақ тўланди.
Бундан ташқари, агентлик 19 та ҳолатда тиббий харажатларни қоплади. 329 нафар Ўзбекистон фуқаросига ижтимоий ёрдам, жумладан, ишга жойлашишда кўмаклашилди.
Россияда ёрдамга муҳтож бўлган ватандошлар учун Миграция агентлиги ваколатхонасининг ишонч телефони фаолият юритмоқда: +7 495 803-40-00.
Шунингдек, хорижда қийин аҳволда қолган ўзбекистонлик аёллар Миграция агентлиги томонидан бир неча турдаги ёрдамга умид қилишлари мумкинлиги хабар қилинмоқда. Шароитга қараб, уларга даволаниш, вақтинчалик турар жой ва адвокат хизматлари ҳақи тўлаб берилади, ишланган пулларни қайтариш, ҳужжатларни тиклаш ёки вояга етмаган фарзандлари билан бирга ватанига қайтишга ёрдам берилади.