MI5 раҳбари Буюк Британияга Россия, Эрон ва сунъий интеллект томонидан таҳдидлар мавжудлигидан огоҳлантирди
Сэр Кен Маккаллум давлат таҳдидларига қарши курашиш учун Совуқ уруш давридан бери энг кўп иш қилинаётганини айтди ва сунъий интеллектдан дронлар ва биологик қуролларни ишлаб чиқишда фойдаланилиши мумкинлигидан огоҳлантирди.
MI5 раҳбари Буюк Британияга Россия, Эрон ва СИ (сунъий интеллект) томонидан таҳдид солинаётганидан огоҳлантирди
Разведка хизмати раҳбарининг маълум қилишича, MI5 давлат таҳдидларига қарши курашишга Совуқ уруш давридагидан кўра кўпроқ ресурс ажратмоқда ва Россияни "биринчи рақамли тажовузкор" деб атади.
Сэр Кен Маккаллум огоҳлантиришича, хорижий рақиблар томонидан таҳдидлар тўрт бараварга ортгани сабабли, MI5 ҳозирда "терроризм ва давлат таҳдидлари бўйича оператив вазифалар деярли тенг миқёсда бўлган" вазиятга дуч келмоқда.
Лондондаги ички разведка хизмати бош қароргоҳида сўзлаган йиллик маърузасида у Эрон ва "ўнг экстремистик терроризм" томонидан ортиб бораётган таҳдидлар ҳақида ҳам огоҳлантирди.
Сэр Кеннинг қўшимча қилишича, MI5 "сунъий интеллектдан фойдаланишга уринган террорчиларни тутган", жумладан, бу технологияни дронлар билан бирлаштириш ҳолатлари аниқланган ва Буюк Британия зўравон гуруҳлар томонидан янги биологик қуроллар ишлаб чиқилиши хавфидан ҳамиша бир қадам олдинда бўлиши кераклигини таъкидлади.
MI5 раҳбарининг айтишича, Россия НАТОнинг жавоб қайтаришидан эҳтиёткорлик билан қочган ҳолда гибрид уруш олиб бормоқда. Унинг сўзларига кўра, Кремль бу чизиқни "кесиб ўтса, аҳмоқлик қилган бўлади".
Сэр Кеннинг таъкидлашича, Россия ҳарбий альянс билан "оддий низо" чиқаришдан ўзини тиймоқда ва Украинага кенг кўламли бостириб киришдаги илгарилаши "минимал ва даҳшатли даражада қимматга тушаётган" бир пайтда, бунинг ўрнига Европа мамлакатларини беқарорлаштиришга ҳаракат қилмоқда.
Унинг айтишича, MI5'нинг Буюк Британиядаги россиялик айғоқчиларни аниқлаш ва ҳайдаб чиқаришдаги муваффақияти Кремлни режалаштирилган ҳужумлар учун ёлланма шахсларга пул тўлашга мажбур қилди.
У сўзида давом этди: "Босқиндан бери 1 000 га яқин чиқариб юборишлар туфайли анъанавий яширин иштироки барбод бўлгач, Кремлнинг глобал воситалар тўплами заифлашиб қолди. Шунинг учун биз уларнинг ўз топшириқларини бажариш учун жиноятчиларга пул тўлашга уринаётганини кўрмоқдамиз".
У қўшимча қилди: "Булар стратегик устунликка эга бўлган буюк давлатнинг ҳаракатлари эмас".
Сэр Кен, шунингдек, Эрон Буюк Британияда гибрид кампанияни кенгайтираётганидан огоҳлантирди.
Разведка раҳбарининг айтишича, ўтган йили Эрон билан боғлиқ фаолият сабаб 50 киши ҳибсга олинган.
Эроннинг бу тажовузкорлигининг катта қисми яҳудий жамоаларига, шунингдек, "ҳарбий объектлар каби қийинроқ нишонларга" қаратилган, деб қўшимча қилди сэр Кен.
Сэр Кеннинг таъкидлашича, Миллий хавфсизлик тўғрисидаги қонун — хорижий давлатлар манфаатлари йўлида Буюк Британия манфаатларига қарши ишлайдиган шахсларга қарши қаратилган 2023 йилги қонун — фаол қўлланилмоқда ва ундан Эрон ҳамда Россия билан бир қаторда Хитойдан келаётган таҳдидларга қарши курашишда ҳам фойдаланилган.
СИ томонидан юзага келаётган таҳдидлар ҳақида гапирар экан, сэр Кен шундай деди: "Биз қидирув ва ҳужум методологиясини такомиллаштириш учун СИдан фойдаланишга уринган террорчиларни тутдик, Бунда СИ билан жиҳозланган дронлар янгича тус бермоқда".
Темз-хаусда сўзлаган сэр Кенни энг кўп ташвишга солган таҳдид — экстремистик гуруҳлар томонидан биологик қурол яратиш учун СИдан фойдаланилиши бўлди.
У бу таҳдид "ҳали амалга ошмаганини" айтди, аммо бу технология "мавжуд ёки ҳатто янги биологик қуроллар бўйича хавф даражасини ўзгартириш салоҳиятига эга" эканидан огоҳлантирди.
Сэр Кен сўзида давом этди: "Бу хавфлар ҳақиқий. Буюк Британия разведка ҳамжамияти — MIS, GCHQ, M16 — уларга қарши курашиш учун Буюк Британиянинг дунё миқёсида тан олинган СИ хавфсизлиги институти билан яқиндан ҳамкорлик қилмоқда".
Апрель ойида Буюк Британияда террористик таҳдид даражаси сўнгги беш йил ичида биринчи марта ўта юқори даражага кўтарилди, бу ҳужум содир бўлиш эҳтимоли жуда юқори эканини англатади.
Сэр Кеннинг айтишича, Ал-Қоида ва ўзини "Исломий давлат" деб атовчи гуруҳ каби исломий ташкилотлар ҳужумларни бошқаришда ва руҳлантиришда давом этмоқда, шу билан бирга, юқори хавф "сезиларли даражада" ўнг экстремистик терроризм билан ҳам боғлиқ.
У сўзида давом этди: "Ўтган йил давомида энг сезиларли тенденция шу бўлдики, муҳожирларга ва мусулмонларга қарши норозиликнинг экстремистик кўринишлари террористик ниятга айланиб кетиш ҳолатлари кўпайди".
Сэр Кеннинг айтишича, ўнг экстремистик терроризм интернет таъсирида "ёшаришга" мойил бўлмоқда — у MI5 сўнгги ойларда "Буюк Британияда радикаллашган 13 ёшли ўнг экстремист"га нисбатан текширув ўтказганини қўшимча қилди.
У шундай деди: "Ушбу суриштирув халқаро ҳамкорларимиздан бирига ўз ҳудудида ҳалокатли ҳужумнинг олдини олиш имконини берган маълумотларни тақдим этди".