Месси Аргентина билан хайрлашди: сўнгги ўйинда гол ва иккита голли узатма
Лионел Месси Аргентина терма жамоасидаги сўнгги учрашувини ўтказди. 39 ёшли футболчи Бенинга қарши хайрлашув баҳсида пеналтидан гол уриб, иккита голли узатма берди. Аргентина 3:0 ҳисобида ғалаба қозонди.
Месси Аргентина билан хайрлашди: сўнгги ўйинда гол ва иккита голли узатма
Ўртоқлик учрашуви 6-октабр куни кечқурун Буенос-Айресдаги «Монументал» стадионида бўлиб ўтди.
Баҳснинг 10-дақиқасида ўйин бир дақиқага тўхтатилди. Месси терма жамоада 10-рақам остида ўйнагани учун айнан шу вақт танланган эди. Стадиондаги мухлислар ўз сардорини олқишлади, Бенин футболчилари эса унинг ёнига келиб, қўл бериб кўришди.
Месси хайрлашув учрашувида Аргентинанинг учала голида ҳам бевосита иштирок этди: биттасини ўзи урди, қолган иккитасига голли узатма берди.
Шу тариқа, унинг Аргентина терма жамоасидаги статистикаси 208 та ўйин ва 126 та голга етди.
Месси миллий жамоада 2005-йилда, 18 ёшида дебют қилган эди. Йигирма йилдан ортиқ давом этган фаолияти давомида у Аргентина билан жаҳон чемпиони, икки карра Америка кубоги ғолиби ва Олимпиада чемпиони бўлди.
Унинг терма жамоадаги энг катта ютуғи 2022-йил Қатарда ўтказилган жаҳон чемпионатидаги ғалаба ҳисобланади.
2026-йилги мундиалда ҳам Аргентина финалгача етиб борди. Бироқ ҳал қилувчи учрашувда Испанияга қўшимча вақтда 0:1 ҳисобида ютқазди. Месси август ойи охирида терма жамоадаги фаолиятини якунлашини эълон қилганди.
Футболчининг клублардаги фаолияти ҳам кўплаб совринларга бой. У «Барселона» билан ўн марта Испания чемпиони, тўрт марта Европа Чемпионлар лигаси ғолиби бўлган. Шунингдек, етти марта Испания кубоги ва саккиз марта мамлакат Суперкубогини қўлга киритган.
Месси 2021-йилда «Барселона»дан «Пари Сен-Жермен»га ўтди ва Франсия клуби билан икки марта чемпион бўлди. 2023-йилдан буён эса АҚШнинг «Интер Маями» жамоасида тўп сурмоқда.
Саккиз карра «Олтин тўп» соҳиби терма жамоа билан хайрлашган бўлса-да, клубдаги фаолиятини давом эттирмоқда.