Мерс: Украинанинг таслим бўлиши - барчамизнинг таслим бўлишимиздир
Германия канслери Фридрих Мерс Украинанинг Россия билан урушда таслим бўлиши Европа учун қабул қилиб бўлмайдиган ҳолат эканини билдирди. Унинг таъкидлашича, бу Киевнинг барча иттифоқчилари капитуляциясини англатган бўлар эди. Шу билан бирга, канслер Германия ва Европа давлатлари исталган вақтда музокараларга тайёрлигини қайд этди.
Мерс: Украинанинг таслим бўлиши — барчамизнинг таслим бўлишимиз
«Биз Украинани бу урушни чўзиш учун қўллаб-қувватлаётганимиз йўқ. Аммо Украинанинг капитуляцияси, айниқса, сўзсиз таслим бўлишига йўл қўйиб бўлмайди. Чунки бу барчамизнинг таслим бўлишимизни англатади», — деган канслер.
Мерс Россия тарқатаётган дезинформация ва гибрид ҳужумларни Германия хавфсизлигига энг катта таҳдид деб атаган. У Москвани совуқ уруш якунидан кейин шаклланган сиёсий тартибга ҳужум қилаётганликда айблаган.
«Ҳозир мени энг кўп ташвишлантираётган нарса иқтисодиётимиз ҳам, АҚШ ҳам, Хитой ҳам эмас, балки Россиянинг жамиятимизга таъсиридир», — деган Германия ҳукумати раҳбари.
Унинг айтишича, гап қўпорувчилик ҳаракатлари, алоқа тизимларига гибрид ҳужумлар ва Германиядаги вазиятни беқарорлаштиришга уринишлар ҳақида бормоқда. Канслер бундай ҳужумлар ҳар куни содир бўлаётганини, бироқ мамлакатда таҳдид миқёси ҳануз етарлича баҳоланмаётганини таъкидлаган.
Аввалроқ Украина президенти Володимир Зеленский АҚШ президенти Доналд Трамп маъмуриятининг сўнгги ҳаракатларини Киевни таслим бўлишга ундашга ўхшатган эди.
18-октабр куни Блоомберг агентлигига берган интервюсида Зеленский Украинани капитуляцияга кўндиришга қаратилган қадамлар ташланган, деган фикрда эканини билдирган. Бироқ у буни америкалик ҳамкорларнинг аниқ мақсади деб аташдан сақланган.
«Америкалик ҳамкорларимиз урушни Украина ҳисобига тезроқ тугатиш мумкин, деб ўйлаётганига ишонгим келмайди. Аммо бу шундай кўринмоқда», — деган Украина президенти.
Трамп эса ўз навбатида Зеленскийни урушни тугатишни истамаётганликда айблаб, унга музокараларни бошқа бировга топширишни тавсия қилган.