Тўқаев: Украинадаги уруш дарҳол тўхташини кутмаяпман
Германия канслери Фридрих Мерс Россиянинг Киевга зарбалари кучайган бир пайтда Украина учун қўшимча ҳаво ҳужумидан мудофаа воситалари изланаётганини билдирди. У бу ҳақда Қозоғистон президенти Қосим-Жўмарт Тўқаевнинг Берлинга ташрифи вақтида гапирди.
Тўқаев: Украинадаги урушнинг зудлик билан якунланишини кутмаяпман
ДВ хабарига кўра, Мерс 29-сентабр куни журналистлар саволларига жавоб берар экан, Украинага ёрдамни кучайтириш масаласида Европа ҳамкорлари билан фаол маслаҳатлашувлар олиб борилаётганини айтган.
Унинг сўзларига кўра, бу муҳокамалар 15–16-октабр кунлари Брюсселда бўлиб ўтадиган Европа кенгаши йиғилишига тайёргарлик доирасида давом этмоқда. Асосий эътибор Украина бюджетини қўллаб-қувватлаш ва ҳаво ҳужумидан мудофаа тизимларига қаратилган.
Мерс ҳаво мудофаасини Украина мудофаасининг «энг заиф нуқтаси» деб атаган. Аввалроқ Украина президенти Володимир Зеленский ҳарбий харажатлар учун қарийб 27 миллиард доллар етишмаётганини маълум қилган эди.
Канслер Киевга ҳаво мудофаа воситаларини етказиб бериш масаласида жаҳон етакчилари билан шахсан музокара олиб бораётганини билдирган. Шунингдек, у Россиянинг фуқаролик инфратузилмасига зарбалари давом этиши мумкинлиги шароитида Украина энергия таъминотини қишга тайёрлашга умид қилган.
«Булар ҳар куни содир этилаётган ҳарбий жиноятлардир», - деган Мерс Россия ҳужумлари ҳақида.
Канслер Тўқаев билан Россиянинг Украинага қарши уруши батафсил муҳокама қилинганини айтган. У Қозоғистон раҳбарига Владимир Путин билан урушни тугатиш ҳақида гаплашгани учун миннатдорлик билдириб, Германия Киевни қўллаб-қувватлашни, жумладан, дипломатик саъй-ҳаракатларни ҳам давом эттиришини таъкидлаган.
Шу муносабат билан Мерс Германия ташқи ишлар вазири Ёҳанн Вадефулнинг Ню-Ёркда Россия ташқи ишлар вазири Сергей Лавров билан яқинда ўтказган учрашувини эслатган. Канслернинг фикрича, Россиянинг ушбу учрашувга муносабати Москва ҳозирча «жиддий музокаралар»дан манфаатдор эмаслигини кўрсатган.
Тўқаев эса Путин билан «жуда яхши муносабатлар»га эга эканини айтиб, Украинадаги уруш бўйича фикрларини тинглагани учун унга миннатдорлик билдирган.
Қозоғистон президенти урушнинг дарҳол тўхташини кутмаётганини, бироқ уни «музлатиш»ни можарога барҳам бериш ва дипломатияга ўтиш йўлидаги биринчи қадам деб билишини айтган. У ёзда ҳам шундай таклифни илгари сурган эди.
Тўқаев Қозоғистон бошиданоқ БМТ низомига, жумладан, барча давлатларнинг ҳудудий яхлитлиги тамойилига содиқлигини таъкидлаб келаётганини қайд этган. Бу позиция унинг Германия президенти Франк-Валтер Штайнмаер билан учрашуви якунидаги қўшма баёнотда ҳам акс этган.