Мерос рўйхатига киритилди

**Мерос рўйхатига киритилди**

Тожикистон шарқидаги Тоғли Бадахшон мухтор вилоятида жойлашган бешта петроглифлар мажмуаси, шунингдек, мамлакат жанубидаги Хатлон вилоятида жойлашган тўртта тарихий-табиий ёдгорлик ЮНЕСКОнинг Бутунжаҳон мероси дастлабки рўйхатига киритилди. Бу ҳақда Тожикистон ҳукумати ҳузуридаги Тарихий ва маданий меросни муҳофаза қилиш агентлиги маълум қилди.

Идора сайтидаги хабарда айтилишича, агентлик ташаббуси ва таклифига биноан рўйхатга Лангар, Даршайр, Шахта, Найзатош ва Бахмалжилга петроглифлар мажмуаси киритилган. Бундан ташқари, унга Хатлон вилоятининг Ховалинг ноҳиясида жойлашган Кулдара, Лоҳути, Оби Мазор ва Хонақо қадимий тарихий-табиий ёдгорликлари ҳам киритилган.

«Ушбу петроглифлар ва қадимий ёдгорликлар Тожикистон тарихий ва маданий меросининг қимматли намуналари сифатида муҳим илмий, маданий ва тарихий аҳамиятга эга», — дейилади агентлик хабарида. У ерда уларни сақлаб қолиш қадимги цивилизациялар тарихи ва минтақанинг маданий ривожланишини ўрганиш учун алоҳида аҳамиятга эга экани таъкидланган.

Идора ушбу ёдгорликларнинг дастлабки рўйхатга киритилишини «Тожикистоннинг тарихий, маданий ва табиий меросини халқаро миқёсда тақдим этиш, шунингдек, уни сақлаш, ўрганиш ва оммалаштириш борасидаги ишларни кенгайтириш йўлидаги муҳим қадам» деб атади.

ЮНЕСКО маълумотларига кўра, дастлабки рўйхатга киритилган петроглифлар мажмуаси турли тарихий даврларга — мезолит, неолит, бронза ва темир асрларига, шунингдек, Ўрта асрларга тегишли. Петроглифларда тоғ ҳайвонлари, антропоморф фигуралар, ов саҳналари, турли рамзлар ва геометрик шакллар тасвирланган.

Кулдара, Лоҳути, Оби Мазор ва Хонақо археологик мажмуалари палеолит даврига оид деб ҳисобланади. Ушбу тарихий ёдгорликлар ҳудудида ибтидоий одамлар ҳаётига оид кўплаб далиллар сақланиб қолган.