Мэн оролидаги сайловлар олдидан кўпчиликни яшаш таннархи ташвишга солмоқда
Аҳоли, тадбиркорлар ва хайрия ташкилотлари умумий сайловлар олдидан эътиборини иқтисодиётга қаратмоқда.
Мэн оролидаги сайловлар олдидан яшаш қиймати кўпчиликни ўйлантирмоқда
Иқтисодиётни ривожлантириш аксарият номзодлар учун бош устувор вазифа сифатида тавсифланди
Аҳоли, корхоналар ва хайрия ташкилотлари нарх-навонинг кўтарилиши босимини ҳис қилаётганликларини айтмоқдалар, кўпчилик Мэн оролидаги умумий сайловлар олдидан иқтисодиётни асосий муаммо сифатида тилга олмоқда.
Рамсидаги бир нечта мустақил дўконлар савдо ҳажми камайгани ва операцион харажатларни қоплаш қийинлашганини айтган бўлса, оролнинг озиқ-овқат банки ёрдамга бўлган талаб икки йил ичида икки баравар ортганини маълум қилди.
Мэн ороли Савдо-саноат палатаси солиқ базасининг қисқариши ва яқинда кўплаб юқори даромадли иш ўринлари йўқотилганига ишора қилиб, оролни олдинда «жуда оғир беш йил» кутаётганидан огоҳлантирди.
Номзодлардан ўз режаларини қандай молиялаштиришлари, корхоналарни қандай қўллаб-қувватлашлари ва ишчи оилалар зиммасидаги босимни қандай енгиллаштиришларини баён қилиш сўралди.
Дуглас аҳолиси юқори нархлар кундалик ҳаётга таъсир қилаётганини айтди, бир неча киши сайлов олдидан яшаш қийматини ўзларининг энг катта ташвиши деб атади.
Дугласлик Шерон Кокс ҳаёт «ҳамёнбоп эмаслигини.. айниқса кексалар ва заиф қатлам вакиллари учун» айтди.
Унинг қўшимча қилишича, ҳар сафар харид қилишга чиққанида нархлар «шунчаки тийинларга эмас», балки «25 ёки 30 пенсга» кўтарилаётган экан.
Шерон Кокс Мэн оролида кундалик ҳаёт ҳамёнбоп бўлмай қолганини айтди
Бир фарзанднинг онаси Кейтлин Гибсон онаси билан бирга яшашини ва кичик қизига ғамхўрлик қилиш давомида бирор нарса тежаб қолиш унга қийин бўлаётганини айтди.
У шундай деди: «Алоҳида кўчиб чиқишга ҳақиқатан ҳам қурбим етмайди. Ҳеч нарса тежай олмаяпман, шунинг учун топган бор-будим, ўзи аслида жуда кам, чақалоғимга кетяпти».
Дугласнинг яна бир турғуни Эндрю Кэрнс ёқилғи ва энергия тўловларининг ошиши «улкан таъсир» кўрсатаётганини айтди.
Эндрю Кэрнс нархлар ойдан-ойга кўтарилаётганини сезиш мумкинлигини айтди
«Бензин, электр энергияси, газ нархи ошяпти. Дўконга бир ой оралиқ билан кирсангиз ҳам нархлар ошаётганини кўришингиз мумкин», — дея қўшимча қилди у.
У бу нарса сайлов олдидан унинг хаёлида эканини айтиб, «харажатларимизни камайтириш учун қила оладиган ишларимиз кўп» эканини қўшимча қилди.
Бир қатор корхоналар сўнгги бир неча йил улар бошдан кечирган энг оғир йиллар қаторида бўлганини таъкидладилар.
Тания Долорес Рамсида 10 йилдан ортиқ вақтдан бери пойабзал ва аксессуарлар дўконини бошқариб келади
«Tania Dolores Shoes and Accessories» дўконидан Тания Долорес шундай деди: «Ҳар бир кун — кураш. Биз аввалгидек даромад топмаяпмиз».
Унинг айтишича, тушумлари «ўн йил олдинги билан бир хил миқдорда», лекин тўловлари «анча юқори».
«Brunch» кафесидан Эми Солтернинг айтишича, хомашё ва энергия нархи оилавий бизнеснинг ишлаш тарзини ўзгартирган.
Бизнес уч йил олдин очилганида, «ҳозиргидан кўра анча осонроқ» эди, деди у ва хомашё нархининг ҳатто озгина ошиши ҳам катта таъсир кўрсатаётганини қўшимча қилди.
Линда Мёрфи номзодлар кичик бизнесга ғамхўрлик қилишларини истади
«Oma Sustainable Living» дўконидан Линда Мёрфи шу йил бошида давлат хизматлари Почта бўлимидан олиб ташланганидан кейин харидорлар оқими кескин камайганини айтди.
У раҳбарликда «кичик бизнесни тушунадиган ва унга ғамхўрлик қиладиган, жамиятнинг, марказий кўчанинг қадрини ва у келтирадиган фойдани тушунадиган одамни» кўришни хоҳлашини айтди.
Мэн ороли Озиқ-овқат банки раиси Дэвид Гоун учинчи сектор ҳам оқибатларни ҳис қилаётганини ва хайрия ташкилоти оролдаги иқтисодий босимларнинг «ўзига хос барометри»га айланганини айтди.
«Икки йил олдин биз ойига 200 та посилка тарқатар эдик. Ҳозир эса ойига 400 та посилка тарқатяпмиз ва бу чегарани ҳам ошиб ўтмоқдамиз», — деди у.
Унинг айтишича, улар қўллаб-қувватлаётган одамларнинг 80 фоизи тўлиқ кун ишлайди, аммо «ҳозирда ўзларини ёки оиласини боқиш учун етарли даромад топмаяпти».
Гоун кўплаб оилалар молиявий жиҳатдан пичоқ тиғида яшаётганини айтди.
«Кўп оилалар озиқ-овқат банкига қарам бўлиб қолишдан атиги бир маош масофасида турибди… бу жуда кўп одамлар учун ҳақиқатдир».
У бўлажак маъмуриятни иқтисодиётни устувор вазифага айлантиришга чақирди.
Клэр Уоттерсон кейинги Калитлар палатаси (House of Keys) оғир беш йилликка тайёр бўлиши кераклигини айтди
Бизнес лобби гуруҳи бўлмиш Мэн ороли Савдо-саноат палатаси орол иқтисодий қийинчиликларнинг «жуда оғир беш йиллиги»га кириб бораётганини айтиб, давлат молиясига бўлган босим ва юқори даромадли иш ўринларининг йўқотилиши ҳам уй хўжаликлари, ҳам корхоналар учун қийин муҳит яратганидан огоҳлантирди.
Унинг айтишича, ўнлаб йиллар давом этган иқтисодий ўсишдан сўнг, ҳукумат томонидан эълон қилинган сўнгги статистика иқтисодиёт 2024 йилнинг мартигача бўлган икки йил ичида 7,4 фоизга пасайганини кўрсатди.
Ва у ўтган йили экспорт секторида, жумладан молия, суғурта ва ишлаб чиқариш соҳаларида мингта иш ўрни йўқотилганини қўшимча қилди.
У бу рақамларни «ниҳоятда ташвишли» деб тавсифлади, зеро сунъий интеллектнинг иш жойига ҳақиқий таъсири ҳали баҳоланиши керак.
Уоттерсон сайловда маҳаллий муаммоларга эмас, балки миллий муаммоларга эътибор қаратишга чақирди.
«Сентябрь ойида биз овоз берадиган нарса — бу миллий ҳукуматимиз… Мэн ороли иқтисодиётини қандай ривожлантиришимиз ва халқаро майдонда ўзимизни қандай намоён қилишимиздир», — деди у.