Маямидан Лас-Вегасга 4 соатда - Гулфстреам тезлик рекордини ўрнатди
Гулфстреам Г400 синов самолётларидан бири Маямидан Лас-Вегасга тўрт соат саккиз дақиқада етиб бориб, ушбу йўналишда тезлик рекордини ўрнатди. Компания маълумотига кўра, НБАА-БАСЕ бизнес авиация кўргазмасига йўл олган самолётнинг ўртача тезлиги соатига 1090 километрни ташкил этган.
Маямидан Лас-Вегасга 4 соатда — Гулфстреам тезлик бўйича рекорд ўрнатди
Гулфстреам Аероспасе кўргазмада Г400 дастуридаги яна бир муҳим босқич — салони тўлиқ жиҳозланган синов самолётининг илк парвози ҳақида ҳам маълум қилди.
Ушбу самолёт АҚШдаги Даллас-Лав-Филд аеродромидан учган. Парвоз 2 соат 46 дақиқа давом этган, аппарат 14,6 километр баландликка кўтарилган.
Синов самолёти салони 11 йўловчига мўлжалланган бўлиб, компания таърифига кўра, ички макон икки ярим зонага бўлинган. Парвоз чоғида мутахассислар салондаги борт тизимларининг баландликда ишлашини, уларнинг функсионаллиги ва йўловчилар учун қулайлигини текширган.
Икки двигателли Г400 бизнес-жети 7780 километр масофага мўлжалланган. Тўлиқ жиҳозланган самолётнинг ҳавога кўтарилиши сертификатлаш дастуридаги навбатдаги қадам бўлган.
Гулфстреам Аероспасе президенти Марк Бернс журналистлар билан учрашувда сертификат олишнинг аниқ муддатини айтмаган. Бироқ у дастур «жуда яхши илгарилаётганини» ва сертификатлашга хавф туғдириши мумкин бўлган муаммоларни кўрмаётганини билдирган.
Г400 парвоз синовлари дастурига жами тўртта самолётни жалб қилиш кўзда тутилган. Маями - Лас-Вегас парвозидаги натижа эса айнан шу шаҳарлар ўртасидаги йўналиш рекорди сифатида эълон қилинган.