Машҳур хитойлик пианиночи Ланг Ланг ва Ўзбекистон Миллий симфоник оркестри Самарқандда концерт берди
Замонамизнинг энг машҳур пианиночиларидан бири Ланг Ланг Ўзбекистон Миллий симфоник оркестри ҳамроҳлигида илк бор Самарқандда чиқиш қилди. Тарихий Регистон майдонидаги концерт дастуридан Бетховен ва Гершвин асарлари ўрин олди. Мусиқий кечада «Газета» ҳам иштирок этди.
Машҳур хитойлик пианиночи Ланг Ланг ва Ўзбекистон Миллий симфоник оркестри Самарқандда концерт беришди
Хитойлик пианиночи Ланг Ланг — жаҳон академик мусиқасидаги энг ёрқин сиймолардан бири. У дунёнинг етакчи оркестрлари билан ва энг йирик концерт майдонларида чиқиш қилади, шунингдек, Пекиндаги 2008 йилги Олимпиаданинг очилиш маросимида иштирок этган.
Мунаққидлар унинг нафақат виртуоз техникасини, балки саҳнадаги ифодали манерасини ҳам юқори баҳолашади: пианиночи кўзларини юмади, клавиатура устига эгилади ва қўлларини роялдан кескин тортади. The Guardian нашри Ланг Лангнинг 2025 йилда Лондоннинг Barbican Hall залидаги концертига ёзган тақризида унинг ҳайратланарли ритмик эркинлигини алоҳида таъкидлаб ўтди — у ҳатто яхши таниш репертуарда ҳам импровизация таассуротини ярата олади.
Ўтган дам олиш кунлари минглаб тингловчилар Самарқанддаги тарихий Регистон майдонида Ланг Лангнинг виртуоз ижросини тинглашди. Пианиночи дирижёр Алибек Кабдураҳмонов бошчилигидаги Ўзбекистон Миллий симфоник оркестри билан биргаликда чиқиш қилди. Ушбу концерт, худди 2024 йил ноябрь ойида Тошкентда бўлиб ўтган биринчи концерт каби, Ўзбекистон Маданият ва санъатни ривожлантириш жамғармаси томонидан ташкил этилди.
Икки йил аввал Ланг Ланг «Ўзбекистон» халқаро анжуманлар саройида жаҳон классикаси асарларидан иборат яккахон дастур билан чиқиш қилган эди. Пианиночининг сўзларига кўра, маҳаллий томошабинларнинг самимий қабули ва академик мусиқага бўлган қизиқиши унда алоҳида таассурот қолдирган. Ўшанда унинг Самарқанд билан ғойибона танишуви ҳам бўлиб ўтганди.
«Концертдан кейин кечки овқат пайтида менга Самарқанднинг видеосини кўрсатишди. Мен: „Бу қаер?“ — деб сўрадим, чунки шаҳар худди „Минг бир кеча“ эртакларининг жонланган тасвирига ўхшарди. Тез орада мен бу ерда чиқиш қилиш таклифини олдим ва ниҳоят Регистонни ўз кўзларим билан кўрдим. Айниқса, кечқурун, чироқлар ёниб, атрофдаги ҳамма нарса тушлар оламига ўхшаб қолганда у жуда гўзал бўлар экан», — деди Ланг Ланг.
Самарқандда Ланг Ланг ва Ўзбекистон Миллий симфоник оркестри Людвиг ван Бетховеннинг фортепиано ва оркестр учун 5-сонли концертини («Император») ва Жорж Гершвиннинг «Блюз услубидаги рапсодия»сини ижро этишди.
«Регистон — Шарқ ва Ғарб учрашадиган ажойиб тарихий маскан. Шунинг учун бу ерда мен икки хил мусиқа маданиятини: Бетховеннинг Европа классикаси ва Гершвиннинг Америка жазини бирлаштиришни хоҳладим», — дея тушунтирди пианиночи.
Чиқиш арафасида пианиночи Самарқанднинг тарихий обидаларини кўздан кечирди ва оркестр билан биргаликда майдонда кечки репетиция ўтказди.
«Биз биргаликда атиги бир марта репетиция қилдик, лекин дарҳол тил топшишдик — худди анчадан бери танишдек эдик. Оркестрнинг Бетховенда ҳам, Гершвинда ҳам янграши менга жуда ёқди, айниқса мусиқачиларнинг „Блюз услубидаги рапсодия“да свингни (жазга хос ритмик пульсация — таҳр.) қандай ҳис қилишлари таҳсинга лойиқ», — дея ўртоқлашди пианиночи.
Биринчи бўлиб Людвиг ван Бетховеннинг Бешинчи фортепиано концерти («Император») янгради — бу композиторнинг бешта фортепиано концертидан охиргисидир. У 1809 йилда, Вена Наполеон урушларининг ҳарбий ҳаракатлари марказида қолган пайтда яратилган. «Император» номи кейинроқ пайдо бўлган ва Бетховенга тегишли эмас. Концерт кучли биринчи қисм билан бошланади, сўнгра осойишта адажио давом этади ва асар шиддатли финал билан якунланади. Ланг Ланг жуда эмоционал тарзда чалди: гоҳ клавиатура устига эгилди, гоҳ кульминация лаҳзаларида кескин қаддини ростлади.
Дастурнинг иккинчи қисмида Жорж Гершвиннинг «Блюз услубидаги рапсодия»си янгради. Унинг кларнетдаги машҳур кириш глиссандоси асарнинг жаз оҳангини дарҳол белгилаб беради. Рапсодия 1924 йилда Пол Уайтменнинг Нью-Йоркдаги Aeolian Hall залида бўлиб ўтган «Замонавий мусиқадаги тажриба» концерти учун ёзилган бўлиб, унда Гершвиннинг ўзи фортепиано партиясини ижро этган. Асарда жаз ва концерт мусиқаси анъаналари элементлари, блюз интонациялари ва синкопали ритмика бирлашади. Бетховендан кейин Ланг Лангнинг ижроси янада эркинроқ ва экспрессив бўлди.
Асосий дастур тугаганидан сўнг, томошабинлар артистларни узоқ вақт қўйиб юборишмади. Давомли қарсаклар остида Ланг Ланг томошабинларга бир неча бор таъзим қилиб, саҳнани тарк этди, шундан сўнг оркестр олқишларга жавобан Анор Назаровнинг «Тароналар базми» байрамона асарини ижро этди.
Ланг Ланг ва Ўзбекистон Миллий симфоник оркестри яна бир бор биргаликда 2027 йилда Пекинда, Буюк Хитой девори этагида чиқиш қилишади.