Марина Влади — актриса ва Владимир Высоцкийнинг беваси вафот этди

2 соат олдин

Француз актрисаси ва ёзувчиси, Владимир Высоцкийнинг беваси Марина Влади 24 сентябрь куни Францияда 88 ёшида вафот этди. Сўнгги йилларда у Парижда анча хилватда яшаган ва жамоатчиликка кам кўриниш берган эди. Влади ўз уйида, яқинлари ва уй ҳайвонлари қуршовида ҳаётдан кўз юмди.

Актрисанинг вафоти ҳақида унинг фарзандлари маълум қилди. Ўлимнинг расмий сабаби айтилмади, бироқ 25 сентябрь куни Владимир Высоцкийнинг ўғли Никита ТАСС агентлигига Влади узоқ вақт давомида касал бўлганини маълум қилди. У касаллик ҳақида бошқа тафсилотларни келтирмади.

Сўнгги йилларда Влади жамоатчилик ҳаётида деярли иштирок этмаган. 2003 йилда унинг тўртинчи турмуш ўртоғи, шифокор-онколог Леон Шварценберг вафот этганидан кейин у адабий фаолият билан шуғулланишни давом эттирди. Влади ҳикоялар, романлар, мемуарлар ва эсселар ёзди, шунингдек, Владимир Высоцкий билан боғлиқ материаллар устида ишлади. Шоир вафотидан кейин у "Владимир ёки узилган парвоз" номли хотиралар китобини нашр этди ва шу номли спектаклни саҳналаштирди.

Высоцкийнинг ўғли Никита Владини охирги марта тахминан 15–20 йил аввал кўрганини айтди. Шу билан бирга, у отасининг хотирасини сақлаб қолишга қўшган ҳиссасини алоҳида таъкидлади.

Марина Влади — Екатерина-Марина Полякова-Байдарованинг саҳнавий тахаллусидир. У 1938 йил 10 майда Франциянинг Клиши шаҳрида рус муҳожирлари оиласида туғилган. Влади актрисалик фаолиятини болалигиданоқ бошлаган — илк ролини 10 ёшида олган. Фаолияти давомида у юзга яқин фильмда суратга тушган.

Влади Жан-Люк Годар, Орсон Уэллс ва бошқа машҳур режиссёрлар билан ҳамкорлик қилган. Унинг эътиборга лойиқ ишлари қаторига "Сеҳргар аёл" (Колдунья), "Мен у ҳақда биладиган икки ёки учта нарса", "Клев маликаси" ва "Ярим тунги қўнғироқлар" фильмлари киради. 1963 йилда актриса Марко Феррерининг "Асал ари маликаси" (шунингдек, "Никоҳ тўшаги" номи билан ҳам машҳур) фильмидаги энг яхши аёл роли учун Канн кинофестивали совринини қўлга киритган. 1965 йилда Влади Москва халқаро кинофестивали ҳакамлар ҳайъати таркибига кирган.

Влади Владимир Высоцкий билан 1967 йилда танишган. Улар 1970 йилда турмуш қуришган ва 1980 йилда шоир вафот этгунига қадар бирга бўлишган. Жуфтликнинг фарзандлари бўлмаган. Высоцкий билан турмуш қуришидан олдин актриса режиссёр Робер Оссейн ва учувчи Жан-Клод Бруйе билан никоҳда бўлган, шоир вафотидан кейин эса Леон Шварценбергга турмушга чиққан. Владининг аввалги никоҳларидан уч нафар ўғли бор эди.