Луланинг таъкидлашича, Бразилиядаги овоз бериш жараёни олдидан Метаънинг эҳтимолий аралашуви сабабли рақиби номзодликдан маҳрум этилиши керак
Бразилия президенти технология компаниясини Флавио Болсонаруга харихоҳлик қилаётганликда айбламоқда, компания эса буни рад этмоқда.
Луланинг таъкидлашича, Бразилиядаги овоз бериш олдидан Мета аралашуви гумон қилингани сабабли рақиби сайловдан олиб ташланиши керак
Сўл қанотдаги амалдаги президент Луис Инасиу Лула да Силва якшанба куни бўлиб ўтадиган овоз беришнинг иккинчи босқичида ўзининг ўнг қанотдаги рақиби Флавиу Болсонару билан куч синашади
Бразилия президенти Луис Инасиу Лула да Силванинг сайлов кампанияси президентлик сайловининг якшанба куни бўлиб ўтадиган якуний босқичи олдидан Мета ижтимоий медиа компаниясининг аралашуви назарда тутилган ҳолда, ўнг қанотдаги даъвогар Флавиу Болсонаруни сайловдан олиб ташлашни сўради.
Чоршанба куни мамлакатнинг юқори сайлов судига топширилган аризада сўл қанотдаги амалдаги президент Whatsapp, Instagram ва Facebook ортида турган технологик гигант Мета’ни Болсонару кампаниясига ёрдам бериш учун унинг контентини чеклашда айблади.
Болсонару эса, ўз навбатида, Луланинг WhatsApp’да давлат постларини оммавий тарқатганини рўкач қилиб, уни сайловдан олиб ташлашга чақирувчи ариза топширди.
Мета иккала сайлов кампаниясига турлича муносабатда бўлинганини рад этди.
Ушбу қадам БМТ экспертларининг чоршанба кунги изоҳларидан сўнг амалга оширилди, улар ҳар бир кампаниянинг Мета платформаларида сайловчиларга етиб бориш имкониятларидаги фарқлар ҳақидаги хабарлардан хавотирда эканликларини билдиришган эди.
БМТнинг сўз эркинлиги бўйича махсус маърузачиси томонидан тайёрланган ҳисоботда айтилишича, Мета сайлов пайтида интернетда тенг имкониятларни кафолатлаши керак.
Унда шу жумладан "номзодлардан бирининг кампания аккаунтининг вақтинчалик тўхтатилиши; аудитория жалб қилиниши, фойдаланувчилар лентаси, кўришлар сони ва қамровдаги фарқлар; ўша кампаниянинг Instagram’даги постларига қўйилган чекловлар" каби ҳодисалар кўрсатиб ўтилган.
"Маълумотлар, жумладан Мета ходимларининг маълумотлари, президентлик пойгасининг бир томони билан боғлиқ аккаунтлар номутаносиб равишда чекланганини кўрсатмоқда", дейилади унда.
Мета сайловнинг бирор томонига фойда келтириш учун ҳаракат қилганини рад этди ва Болсонару ҳамда Лулага тенг муносабатда бўлиш бўйича Бразилия суди қарорига амал қилишини айтди.
Лула кампанияси аввалироқ Болсонару билан боғлиқ аккаунтлар ва контент рағбатлантирилаётганини даъво қилиб шикоят киритган эди.
Фойдаланувчилар, шунингдек, Мета’нинг сунъий интеллект воситалари Лула билан боғлиқ тасвирларни ярата олмаётганини айтишди.
Лула тарафдорлари дўшанба куни Сан-Паулудаги Мета офиси олдида йиғилиб, компанияни Бразилия сайлов жараёнига аралашишда айбладилар
Лула тўртинчи муддатга ўз номзодини қўйган бир вақтда, бразилияликлар якшанба куни овоз беришади.
Болсонару 4 октябрь куни бўлиб ўтган овоз беришнинг биринчи босқичида Лулани озгина фарқ билан ортда қолдирди, аммо тўғридан-тўғри ғалаба қозониш учун зарур бўлган ҳақиқий овозларнинг 50 фоизини йиға олмади.
Чоршанба куни Лула кампанияси Бразилия Олий Сайлов Судига (TSE) Болсонару ва унинг вице-президентликка номзоди Альфредо Гаспарни "иқтисодий ҳокимиятни суиистеъмол қилиш ва ижтимоий тармоқдан ножўя фойдаланиш" бўйича текширишни сўраб ариза топширди.
Аризада, шунингдек, Болсонаруга 2026 йилги сайловлардан сўнг саккиз йил давомида давлат лавозимларига номзодини қўйиш тақиқланиши сўралган.
Ушбу орада, судланган собиқ президент Жаир Болсонарунинг ўғли Флавиу Болсонару ўз рақибини "сиёсий ва иқтисодий ҳокимиятни суиистеъмол қилиш"да айблади.
Унинг айтишича, ҳукумат ижтимоий дастурларни тарғиб қилувчи оммавий хабарларни Whatsapp орқали юбориш учун расмий маълумотлар базаларидаги шахсий маълумотлардан фойдаланган.
Жамоатчилик фикрини ўрганиш сўровномалари якшанба кунги ҳал қилувчи босқич жуда шиддатли кечишини кўрсатмоқда, чунки Бразилиянинг 159 миллион рўйхатга олинган сайловчилари сайлов участкаларига боришга тайёргарлик кўраётган бир пайтда иккала номзод ўртасидаги фарқ жуда оз.