Лимузиндан зирҳли автомобилгача: Рим папалари фойдаланган машиналар — фото
Ватикан музейида Рим папалари фойдаланган саккизта тарихий автомобил намойиш этилмоқда. Улар орасида 1930-йилги ҳашаматли лимузиндан тортиб, ўқ ўтмас ойналар билан жиҳозланган замонавий машиналаргача бор.
Лимузиндан зирҳли автомобилгача: Рим папалари фойдаланган машиналар — фото
Рим папаси сафарлари чоғида минглаб диндорлар билан учрашади. Одамлар уни яхшироқ кўриши учун аввал усти очиқ, кейин эса ўқ ўтмас шаффоф ойнали автомобиллар яратилган. Бундай машиналар “папамобил” деб аталади.
Ватикан музейида “Папамобилларнинг 100 йиллик тарихи” номли кўргазма очилди. Унда 1930–2012-йиллар оралиғида Рим папалари фойдаланган саккизта тарихий автомобил намойиш этилмоқда. Кўргазмада қарийб бир аср давомида ушбу машиналарнинг тузилиши ва хавфсизлик тизими қандай ўзгарганини кўриш мумкин.
Энг қадимги автомобил — 1930-йилда Папа Пий ХИ га совға қилинган Нüрбург 460 лимузини. Унинг салонида малина рангидаги ипак мато билан қопланган ҳашаматли кресло бўлган. Ташқи кўринишидан эса у оддий вакиллик автомобилига ўхшаган.
Кейинги йилларда папалар одамлар билан яқинроқ мулоқот қилиши учун уларнинг автомобиллари такомиллаштирилган. Масалан, 1960-йилда Иоанн ХХИИИ учун орқа ён ойналари ечиладиган машина тайёрланган. 1965-йилда эса Павел ВИ учун томи баландроқ, усти очиладиган автомобил ишлаб чиқилган. Унда папа тик туриб, диндорларга қўл силкитиб салом бериши мумкин бўлган.
Папамобиллар тарихидаги энг катта ўзгариш 1981-йил 13-майда юз берган. Ўша куни Авлиё Пётр майдонида Иоанн Павел ИИ га суиқасд уюштирилган. Папа ҳеч қандай ҳимоя воситаси бўлмаган усти очиқ автомобилда кетаётганида ўқ еб, яраланган.
Шундан сўнг папамобилларнинг хавфсизлик тизими қайта кўриб чиқилган. 1982-йилдан бошлаб машиналарга ўқ ўтмас ойналар ўрнатила бошлаган. Шаффоф ҳимоя қопламасига қараб уларни ҳазил тариқасида “консерва” ёки “аквариум” деб аташган.
Кўргазмада намойиш этилаётган 2002-йилги МЛ 430 ва 2012-йилги МЛ 500 моделлари янада қалин зирҳли ойналар билан жиҳозланган. 2024-йилда эса Ватикан тарихида илк бор Г 580 модели асосида яратилган тўлиқ электр папамобил пайдо бўлган.
Ватикан музейлари директори Барбара Яттанинг айтишича, кўргазмадаги барча автомобиллар Мерседес-Бенз компанияси томонидан ишлаб чиқарилган. Компания ўнлаб йиллардан бери Католик черкови раҳбарлари учун махсус машиналар тайёрлаб келмоқда.