“Ли Дон Ук билан учрашяпман деб ўйлагандим”: кореялик аёл фирибгарлик оқибатида 25 минг долларидан айрилди

“Ли Дон Ук билан учрашяпман деб ўйлагандим”: кореялик аёл фирибгарлик сабаб 25 минг долларидан айрилди

СБС телеканали репортажида 30 ёшли аёл бир йилдан ортиқ вақт давомида Ли Дон Ук деб ўйлаган шахс билан ишқий муносабатда бўлганини айтиб берди.

“У менга худди севги изҳор қилгандек бўлди, тушуняпсизми. Ҳатто ота-онамникига бирга бориш ва оилаларимизни таништириш ҳақида ҳам гаплашдик. Ҳаммаси шунчалик чуқурлашиб кетди. Оқибатда орамизда ишқий муносабатлар бошланди. “Мен сени севаман, азизам”, дерди у. Мен уни “оппа” (севгилим) деб чақирардим, у эса мени “чагия” (азизам) деб атарди. Биз деярли бир йил шу тарзда гаплашдик. Мен тахминан 30–40 миллион вон сарфладим. Ҳатто жамғарма ҳисобимни ёпиб, тирикчилик учун мўлжалланган пулларни ишлатдим. Жами бўлиб унга 35 миллион вон бердим”, дейди жабрланувчи.

Аёл, шунингдек, ўзи актёр деб ҳисоблаган шахс билан ёзишмаларининг скриншотларини ҳам кўрсатди. Бироқ унга юборилган суратлар сунъий интеллект ёрдамида яратилган эди.

Унинг айтишича, ҳаммаси ижтимоий тармоқлардаги оддий хабардан бошланган.

“Аввалига у менга ёзди, саҳифам унга ёққанини, ёқимтой эканлигимни айтди. Кейин биз ҳар куни гаплаша бошладик. У жуда эътиборли эди, куним қандай ўтганини сўрарди, хайрли тонг ва хайрли тун тиларди. Бу у эмаслиги хаёлимга ҳам келмаганди...”

Бир неча ойлик мулоқотдан кейин “актёр” молиявий қийинчиликлардан нолий бошлаган. Аввалига бу кичик суммалар эди, кейин эса тобора ошиб борди. Севган инсонига ёрдам бераётганига ишонган аёл унга қайта-қайта пул ўтказиб турарди.

“У агентлик билан муаммолари борлигини, зудлик билан қаергадир кетиши кераклигини, ҳозир гонорарини ололмаслигини айтарди. Мен ишонардим. Мен фақат ёрдам беришни хоҳлардим”.

16-сентябр куни Ли Дон Укнинг “Кинг Конг бй Старшип” агентлиги расмий баёнот бериб, ўзини агентлик санъаткорлари қилиб кўрсатиш ҳолатларидан огоҳлантирди: “Кинг Конг бй Старшипъдан ҳеч ким шахсий мессенжерлар ёки ижтимоий тармоқлардаги аккаунтлар орқали пул, тўлов, шахсий маълумотлар ёки бошқа қимматбаҳо нарсаларни сўрамайди”.

Баёнотда компания бундай ҳолатларга тез-тез дуч келиши ҳам қайд этилган: “Биз бир неча бор санъаткорларимизнинг исмлари ва фотосуратларидан фойдаланадиган сохта аккаунтлар ҳақида хабарлар олдик. Биз мухлислардан ҳушёр бўлишни ва фитналарга учмасликни сўраймиз”.

Агентлик, шунингдек, шубҳали аккаунтлар ҳақида [email protected] расмий электрон почтасига хабар беришни сўради.

Фирибгарлар Ли Дон Ук исмидан биринчи марта фойдаланаётгани йўқ. Унинг расмий веб-сайтида 2020-йилдаёқ сохта аккаунтлар ҳақида огоҳлантириш эълон қилинган бўлиб, унда мухлислардан нотаниш кишиларга пул ва шахсий маълумотларни юбормаслик сўралган, 2025-йилда эса агентлик сталкерлар ва шахсий ҳаёт дахлсизлиги бузилишлари ҳақида огоҳлантирган эди. Шундай қилиб, компания бир неча йилдан буён бундай муаммоларга қарши курашиб келмоқда.