Кушнер АҚШ Украина бўйича «тинчлик пакети» тайёрлаётганини айтди
Жаред Кушнернинг сўзларига кўра, Трамп Россия ва Украина орасида «душманлик бўлмаслиги, уларнинг улкан салоҳиятга эга бўлиши ва бир-бири билан ёвлашиш ўрнига манфаат топишларига эришиш»ни истайди.
Кушнер АҚШ Украина бўйича «тинчлик пакети» тайёрлаётганини билдирди
Америка етакчисининг куёви Жаред Кушнер АҚШ президенти Доналд Трамп тинчликка эришиш учун чоралар мажмуасини тайёрлашни топширганини айтди. У бу ҳақда Киевда Украина президенти Володимир Зеленский билан бўлиб ўтган музокаралардан кейин маълум қилди.
«Президент Трампнинг вазифаси ва бизнинг Стив билан шуғулланаётган ишимиз - тинчлик пакетини тайёрлаш», - деди у.
Кушнернинг айтишича, Трамп Россия ва Украина ўртасида «душманлик бўлмаслиги, уларнинг улкан салоҳиятга эга бўлиши ва бир-бири билан ёвлашиш ўрнига манфаат топишларига эришиш»ни хоҳлайди.
Учрашув давомида узоқ муддатли тинчликнинг таркибий қисмлари қандай бўлиши кераклиги ҳамда бунинг Украина, Россия ва бутун дунё учун қандай фойда келтириши муҳокама қилинганини у айтди.
Кушнернинг қўшимча қилишича, уч томонлама музокараларга қайтиш самарали қадам бўлади.
«Биз Стив билан ярим йилча аввалгидек уч томонлама шаклга қайтиш жуда фойдали бўларди деб ҳисоблаймиз. Биз иккала томон билан ҳам музокара ўтказдик ва тез орада олға силжиш бўлади деб умид қиламиз», - деди у.
Ахиос нашрининг Киевдаги музокараларда қатнашган манбасига кўра, Кушнер ва Уиткофф томонлар билан «янгиланган» тинчлик таклифи устида ишлаш ниятида.
«Агар барча манфаатдор томонлар тегишли қадамни ташлашса, вазият яхши томонга ўзгариши мумкин», - деган у.
Уиткофф ва Кушнер 6-сентабр куни Киевга келишди. Бундан олдин улар Москвада президент Владимир Путин билан учрашув ўтказишган. Учрашув қарийб уч соат давом этган.