Путин АҚШ делегацияси ташрифи сабаб Киевга уч кун ўт очмасликни буюрди

Путин АҚШ делегацияси ташрифи муносабати билан Киевга уч кун давомида ўт очмасликни буюрди

Россия президенти Владимир Путин 5-сентябр соат 00:00 дан бошлаб уч кун давомида Киевга зарба бермаслик ҳақида топшириқ берди. Бу ҳақда Кремл матбуот котиби Дмитрий Песков маълум қилди.

Билдирилишича, бу қарор АҚШ делегациясининг ташрифи сабабли қабул қилинган. 6-сентябр куни Украина пойтахтига Қўшма Штатлар президенти Доналд Трампнинг махсус вакили Стив Уиткофф ва унинг куёви Жаред Кушнер келиши режалаштирилган. Бугун, 5-сентябр куни улар Москвада бўлиб турибди. Песковнинг айтишича, улар пойтахтда Путин билан учрашув ўтказади.

Украина президенти Владимир Зеленский бундан бир кун аввал баёнот берган эди. Унинг сўзларига кўра, Украина АҚШ делегацияси ташрифи пайтида Россия ҳудудига зарба беришни тўхтатади. Зеленский Кремлдан ҳам шундай қарор кутаётганини айтганди. Москва бу таклифга расман жавоб бермаган.

Шу билан бирга, 5-сентябрга ўтар кечаси Россия армияси Украина ҳудудларини ўққа тутишни давом эттирди. Жумладан, Днепропетровск вилоятидаги металлургия корхонасига берилган зарба оқибатида беш киши ҳалок бўлди.

Путин ҳафта ўртасида Москва мулоқот қилишни истаган ҳар қандай томон билан мулоқотга очиқлигини таъкидлаганди. Россия президентининг тушунтиришича, Оқ уй вакиллари ҳар доим кутилган меҳмон ҳисобланади ва Кремл улар билан ишлашдан хурсанд бўлади.