Кўп қаватли уйнинг биринчи қаватини нотурар жойга ўзгартириш тақиқландими? Вазирлик изоҳ берди
Кўп қаватли уйнинг биринчи қаватини нотурар жойга айлантириш тақиқлангани ҳақидами? Вазирлик муносабат билдирди
Ижтимоий тармоқларда эндиликда кўп қаватли уйларнинг биринчи қаватидаги хонадонларни нотурар шаклга ўзгартириб бўлмайди, деган мазмундаги хабарлар тарқалди.
Вазирлик изоҳига кўра, қонунчиликка киритилган ўзгартириш фақат эксплуатация муддати, яъни қуриб топширилганига 50 йилдан ошган кўп квартирали уйларга тегишли.
Президентнинг 2026-йил 4-июндаги фармонининг 11-бандида шундай дейилган: “Кўп квартирали уйлардан фойдаланишда назорат тадбирларини кучайтириш мақсадида: а) эксплуатация муддати 50 йилдан ошган кўп квартирали уйларда қайта режалаштириш ишларини амалга ошириш тақиқлансин, бундан мустаҳкамлаш ишлари мустасно; ...”.
Шунга кўра, эксплуатация муддати 50 йилдан ошган кўп квартирали уйларда қайта режалаштириш ишларига, яъни қайта ихтисослаштириб режалаштиришни амалга оширишга рухсат бериш жараёнлари тўхтатилган, дейилади вазирлик жавобида.
Қўшимча қилинишича, эксплуатация муддати 50 йилдан ошмаган кўп квартирали уйларда қайта режалаштириш ишларини амалга ошириш учун тегишли рухсатномалар бериб келинмоқда.
Аввалроқ кўп квартирали уйларнинг биринчи қаватидаги хонадонларни нотурар жой тоифасига ўтказмасдан, уларни савдо ва сервис фаолиятига мослаштиришга рухсат бериш таклиф қилинган эди.