Конго ДРдаги энг ҳалокатли Эбола эпидемиясидан 5000 дан ортиқ киши вафот этди

Ҳукумат маълумотларига кўра, Конго Демократик Республикасида Эбола эпидемиясининг энг оғир тўлқини оқибатида 5 000 дан ортиқ киши ҳалок бўлди.

Вируснинг ушбу штаммига қарши вакцина мавжуд эмас, бироқ ҳозирда клиник синовлар ўтказилмоқда.

Май ойида бошланган ва август ойида мамлакат тарихидаги энг ҳалокатли эпидемияга айланган бу офат 5 000 дан ортиқ одамнинг ёстиғини қуритди, 10 300 дан ортиқ тасдиқланган ҳолат қайд этилди ҳамда мамлакатдаги 26 та вилоятдан саккизтасига тарқалди. Соғлиқни сақлаш расмийларининг билдиришича, жорий ўлим кўрсаткичи 48,6 фоизни ташкил этмоқда.

Соғлиқни сақлаш вазирлигининг сўнгги ахборотига кўра, эпидемиянинг ўчоғи мамлакат шимоли-шарқидаги Итури вилоятида қолмоқда. Ушбу низолар давом этаётган ҳудуд вирусни жиловлаш ҳаракатларини янада мураккаблаштирмоқда. Касаллик ҳолатлари Кения, Нигерия ва Угандада ҳам тасдиқланган.

Бирлашган Миллатлар Ташкилоти маълумотларига кўра, бу КДР тарихидаги 17-эпидемия ва шу кунгача қайд этилган иккинчи энг йирик авж олишдир. Жаҳон соғлиқни сақлаш ташкилотининг (ЖССТ) Африка бўйича бюроси эпидемияни тугатиш учун "асосий назорат чораларини давомли равишда кенгайтириш, зарарланган ҳудудларга киришни яхшилаш ва аҳоли ўртасида тушунтириш ишларини олиб бориш" талаб этилишини маълум қилди. Ташкилот, шунингдек, вакциналарнинг клиник синовлари билан бир қаторда текширув ва даволаш ишлари давом этаётганини қўшимча қилди.

Амалги эпидемия учун Бундибугио туридаги вирус масъул бўлиб, ҳозирда ушбу штаммга қарши ҳеч қандай даво ёки вакцина мавжуд эмас.

Эбола — аломатлари тўсатдан пайдо бўладиган камёб ва ҳалокатли вирусли касалликдир. Касаллик ривожлангани сари қайт қилиш ва ич кетиши кузатилиши, шунингдек, у аъзолар фаолиятининг издан чиқишига олиб келиши мумкин. Айрим, аммо ҳамма эмас, беморларда ички ва ташқи қон кетиши ҳам кузатилади. Вирус қон ёки қайт қилиш суюқлиги каби зарарланган тана суюқликлари билан алоқа қилиш орқали тарқалади.

Касалликни даволашга бўлган ҳаракатлар тиббиёт ходимларига ва эпидемияга қарши курашаётган сиёсатчига қилинган ҳужумлар сабабли ҳам мураккаблашди. Шу ҳафта бошида Эбола ҳақидаги хабарга жавоб бериш чоғида юз берган ҳужумда бир ҳамшира ўлдирилди ва яна бир тиббиёт ходими оғир жароҳат олди. БМТ томонидан қўллаб-қувватланадиган "Радио Окапи" радиосининг хабар беришича, маҳаллий ёшлар уларни сув манбаларини заҳарлашда ва вирусни тарқатишда айблаган.

Ўтган ойда бир сиёсатчи Эбола тарқалишининг олдини олиш чораларини тарғиб қилганидан кейин калтаклаб ўлдирилган эди. Август ойида Қизил хоч жамияти эпидемиянинг дастлабки 100 кунидаги 11 та зўравонлик ҳодисасида унинг кўнгиллилари жароҳат олганини ва тез ёрдам машинасига ўт қўйилганини маълум қилди.

Август ойидан бери Угандада ҳеч қандай ҳолат қайд этилмади, бироқ қўшни КДРдан мамлакатга ўтаётган одамлар учун саёҳат чекловлари сақланиб қолмоқда.

Кенияда тўққизта тасдиқланган ҳолат ва иккита ўлим қайд этилди. Нигерияда бир аёлда касаллик тасдиқланди ва у кейинчалик даволаниш учун Швейцарияга олиб кетилди.

Касалликлар олдини олиш ва назорат қилиш бўйича Европа марказининг маълум қилишича, Европадаги одамлар учун инфекцияни жуқтириш эҳтимоли "жуда паст".