Киевдагилар қиш учун егулик ва сув ғамлай бошлашди

Киев аҳолиси қиш учун озиқ-овқат ва сув захиралашни бошлади

Киев ҳукумати яқинлашиб келаётган қишда узоқ давом этадиган электр узилишларига тайёргарлик кўришни бошлади. Бугун шаҳар маъмурияти озиқ-овқат ҳамда ичимлик суви захиралари тайёрлаб қўйилгани ҳақида маълум қилди.

Бу захиралар ёрдамида шаҳарда 25 минг кишига иссиқ овқат етказиб бериш мумкин. Мериядагиларнинг айтишича, бу маҳсулотлар аввало кам таъминланган фуқаролар учун мўлжалланган. Шунингдек, захиралар блекаут юз берганда «Матонат пунктлари»да, фавқулодда вазиятлардан жабрланганларга ёрдам кўрсатиш ва қутқарув хизмати ходимларини озиқ-овқат билан таъминлаш учун ҳам ишлатилиши мумкин.

Расмийлар қўшимча равишда яна 20 мингта озиқ-овқат тўплами харид қилиш режалаштирилганини билдирган.

Бир неча кун аввал Киев мериясидагилар аҳолининг энг заиф қатламлари учун жойлаштириш пунктлари ҳам тайёрланганини айтганди. Ҳозирча 1300 дан ортиқ ёлғиз кексалар, 400 га яқин ногирон фарзанди бор оилалар ва 500 нафар ногиронлиги бўлган шахсдан қишки турар жой билан таъминлаш бўйича аризалар келиб тушган.

Украина ҳукумати совуқ тушиши билан Россия ўтган қишлардагидек йирик шаҳарлардаги энергетика инфратузилмаларига ҳужумларни кучайтиришини тахмин қилмоқда. Ўтган йил қишида бундай зарбалар юз минглаб одамларнинг кучли совуқда бир неча кун давомида ёруғлик ва иссиқликсиз қолишига сабаб бўлганди. Киев келаётган қишда ҳужумлар оқибати анча оғирроқ бўлишидан хавотирда, чунки Россия аллақачон Украина энергия ишлаб чиқариш қувватларининг 80 фоизини йўқ қилган.

Украина энергетика вазири Денис Шмигал август ойида россиялик ҳарбийлар қишда нафақат энергетика обьектларига, балки Украина сув таъминоти тизимларига ҳам ҳужум қилишини тахмин қилганди. «Ўтган қишда улар электр тармоқлари ва иситиш тизимларига зарар етказган, аммо электр бўлмаса ҳам, газ ва сув бўлса, омон қолиш мумкин эди. Сув ва канализациясиз эса уч кундан ортиқ бардош бериш жуда қийин», – деганди у.