Киевда ракета тўққиз қаватли уйга урилди
13-октабр куни Россиянинг Киевга ҳужуми оқибатида икки киши ҳалок бўлди, 21 киши жабрланди. Шаҳар мери Виталий Кличкога кўра, ракета тўққиз қаватли тураржойга урилган. Жабрланганлар орасида саккиз ёшли бола ҳам бор.
Киевда ракета тўққиз қаватли уйга келиб урилди
ДВ маълумотига кўра, ракета Киевнинг шимоли-шарқидаги Деснянский туманида жойлашган уйга тушган. Бинонинг пастки саккиз қаватидаги хонадонларда ёнғин чиққан.
Кличко 16 нафар жароҳатланган киши касалхонага ётқизилганини, улардан тўрт нафари оғир аҳволда эканини айтган.
Мер, шунингдек, Соломенский туманида дрон офис биносига урилгани, Дарницкий туманида дрон парчалари стадион ҳудудига тушгани ва Деснянский туманида омборхона ёнганини маълум қилган.
Украина президенти Володимир Зеленскийнинг сўзларига кўра, ҳужум нишони Киевнинг асосий энергетика обьектларидан бири — 4-иссиқлик электр маркази бўлган. Зарба Доналд Трамп эълон қилган энергетик сулҳ фонида амалга оширилган.
Зеленский ҳамкорлар Украинани Россия баллистик ракеталарни учиргани ҳақида огоҳлантирмаганини таъкидлаган. У энергетика обьектлари вайрон қилинаётган бир вақтда ҳатто ракета учирилиши ҳақида огоҳлантириш ҳам олинмаётганини адолацизлик деб баҳолаган.
Украина президенти АҚШ воқеаларни ва уруш давом этаётгани учун ким жавобгар эканини кўриши муҳимлигини айтган. У Украина разведкаси маълумотларига таянган ҳолда, Россия янги баллистик ракета зарбаларига тайёрланаётганини ҳам билдирган.
Айни куни Вашингтонда журналистлар билан суҳбатлашган Доналд Трамп АҚШ Украинага разведка маълумотларини бермаётгани ҳақидаги хабарларни рад этган.
«Биз уларга ёрдам беряпмиз ва разведка маълумотларини алмашяпмиз», - деган Трамп. Унинг айтишича, АҚШ урушни тугатиш учун Украина ва Россия билан ишламоқда.
Аввалроқ Трамп Владимир Путин тинчлик келишувига Зеленскийдан кўра кўпроқ қизиқиш билдираётганини айтган эди. Энергетик сулҳ бузилгани ҳақидаги саволга эса «қоидабузарликлар ҳар икки томондан бўлганини» билдирган.
Бу Украина шаҳарларига сўнгги кунлардаги навбатдаги ҳужумдир. 13-октабрга ўтар кечаси Харкивга берилган зарба оқибатида, шаҳар мери Игор Терехов маълумотига кўра, уч киши ҳалок бўлган. 12-октабр оқшомида Киевдаги 25 қаватли уйга дрон урилиши натижасида эса икки киши ҳаётдан кўз юмган.
Россия Мудофаа вазирлиги эса Киевдаги ҳарбий-саноат корхоналари ва логистика марказларига, жумладан, дрон ишлаб чиқариш сехи ҳамда локомотив депосига зарбалар берилганини даъво қилган.