Россиянинг Киевга ёпирилма ҳужуми – фотосуратлар
Киевда тўққиз киши Россия ҳужуми қурбони бўлди. Зеленский Россия учирган 27 та баллистик ракетадан атиги биттаси уриб туширилганини айтиб, бунга «тутиб олувчи» ракеталар қолмаганини сабаб қилиб келтирди. «Бизда тўхтатувчи ракеталар йўқ, бу эса Россияни рағбатлантирмоқда», – деган у.
Россиянинг Киевга ҳужуми: фотосуратлар
1-августга ўтар кечаси ва тонгда Россия ҳарбийлари Киевни дронлар ва ракеталар билан нишонга олди.
Шаҳар мери Виталий Кличконинг сўнгги маълумотларига кўра, ушбу ҳужум натижасида тўққиз киши ҳалок бўлган, 30 дан ортиқ киши яраланган, улардан 17 нафари шифохонага ётқизилган.
Шаҳарнинг еттита туманида ёнғинлар ва вайронгарчиликлар қайд этилган. Хусусан, Литванинг Украинадаги элчихонаси биноси ҳам зарба вақтида шикастланган, бироқ дипломатик идора ходимлари орасида тан жароҳати олганлар йўқ. Литва Ташқи ишлар вазирлиги Россия Федерациясининг махсус вакилини чақиртириб, унга норозилик нотасини топширган.
Украина президенти Володимир Зеленскийнинг маълум қилишича, тунда мамлакат ҳудудига жами 27 та баллистик ракета учирилган, аммо Украина ҳарбийлари улардан фақат биттасини уриб тушира олган. У буни Патриот тизимлари учун тутиб олувчи ракеталар етишмаслиги билан изоҳлаган. Зеленскийнинг таъкидлашича, "айнан баллистикага қарши тутиб олгичларнинг бундай тақчиллиги Россияни шундай зарбалар учун рағбатлантирмоқда".
Шу муносабат билан Зеленский иттифоқчиларни Украинага Патриот тизимлари учун кўпроқ ракета беришга чақирган. Унинг сўзларига кўра, "баллистикага қарши [ёрдамнинг] ҳар бир пакети одамларимиз ҳаётини асраб қолади. У йўқлигида ҳар тунда қурбонлар бўлаверади".
Украина ҳукумати мунтазам равишда Россиянинг баллистик ҳужумларини қайтариш учун зарур бўлган ракеталар йўқлиги ҳақида хабар бериб келмоқда. Киевдагилар бу масала қишгача ҳал қилинмаса, Россия энергетика инфратузилмасига зарбаларни сезиларли даражада кучайтириши, бу эса йирик шаҳарларни совуқ кунларда электр ва иссиқлик таъминотисиз қолдиришидан хавотирда.
Июл ойи бошида АҚШ президенти Доналд Трамп Анқарада Зеленский билан учрашувда Украинага Патриот ракеталари ишлаб чиқариш учун лицензия беришга ваъда берганди. Бироқ, 30-июл куни АҚШ президенти лицензия берилишига "ишончи комил эмаслиги" ва ҳали ҳам бу масалани "кўриб чиқаётгани"ни айтди.
28-июл куни Оқ уйда бўлиб ўтган музокараларда Зеленский Трампдан қишгача Украинага 300 та Патриот ракетасини топширишни ҳам сўраганди. Тҳе Атлантис нашри манбаларига кўра, АҚШ президенти рад жавобини берган. Эрон билан урушнинг дастлабки ҳафталарида бундай ракеталар жуда кўп ишлатиб юборилгани туфайли ҳозирда АҚШнинг ўзида ҳам бундай ракеталар захираси етарли эмас.