Киевда куч тузилмалари ўртасида отишма, Испанияда намойишлар – кун дайжести
Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Киевда куч тузилмалари ўртасида отишма, Испанияда намойишлар – кун дайжести
2-сентабр куни Киевда Украина Хавфсизлик хизмати (СБУ) ва Мудофаа вазирлиги Бош разведка бошқармасининг (ГУР) «айрим бўлинмалари ўртасида» отишма юз берди. Бу ҳақда президент Володимир Зеленский тасдиқлаб, воқеани «мутлақо шармандали ҳолат» деб баҳолади.
«Бош прокурор ва Давлат тергов бюроси барча тафсилотларни аниқлайди: ушбу воқеа иштирокчиларининг барча кўрсатмалари ва баёнотлари, бутун вазият қадамма-қадам текширилади», деди Зеленский.
Украина президенти айбдорларни жавобгарликка тортишга, жумладан, «кадрлар бўйича қарорлар» қабул қилишга ва «ҳар иккала хизматда ҳам ички текширувлар» ўтказишга ваъда берди. Шунингдек, тез орада Хавфсизлик хизматининг «Давлат сирини сақлаш ва лицензиялаш департаменти» бошлиғи Олег Храмов лавозимидан олинди.
2-сентабр тонгида Киевнинг Днепровский туманида СБУ ва ГУР ходимлари ўртасида отишма бўлгани ҳақида хабарлар тарқалди. Хавфсизлик хизмати вакиллари тезкор ходимларига тинтувлар вақтида қуролли ҳужум уюштирилганини маълум қилди. Натижада «қаршилик кўрсатган баъзи шахслар» яраланган, ҳужум қилганлар эса қўлга олинган, дея билдирди СБУ. Идора, шунингдек, қўлга олинганлар Украина армияси «бўлинмаларидан бирига» тегишли эканини айтди.
Тасдиқланмаган маълумотларга кўра, гап Украина армиясининг «Россия кўнгиллилар корпуси» бўлинмаси қўмондони Степан Каплунов ҳақида кетмоқда. Хавфсизлик хизмати уни «суиқасд қилиниши» эҳтимоли юзасидан олиб кетган. Ҳарбийлар эса хавфсизлик ходимларига қаршилик кўрсатган.
Каплуновни қўлга олиш чоғида Хавфсизлик хизмати махсус кучлари ва ҳарбий разведка ходимлари ўртасида отишма чиққани айтилмоқда. ГУРнинг бир нафар ходими вафот этган бўлиши мумкин.
Каплуновнинг адвокати сўзларига кўра, унинг мижози 2-сентабр куни кундузи «аллақачон озодликка чиққан» бўлган. Ҳуқуқшунос СБУнинг «суиқасднинг олди олингани ҳақидаги версияси уйдирма» бўлиши мумкин деб ҳисобламоқда.
Яқин Шарқдаги узоқ муддатли хизматдан сўнг АҚШ Ҳарбий-денгиз кучларининг авиаташувчи кемаси Таиланднинг Паттая курорти шаҳрига кирмоқда.