Кичик Дональд Трамп ва Беттина Трампнинг айтишича, Путиннинг иттифоқчиси тўй тантаналарининг бир қисмини «совға» сифатида тўлаган
Жуфтликнинг Instagram’даги постида Багама оролларидаги икки кунлик тўй тантаналари қисман Умар Кремлев томонидан молиялаштирилгани айтилган.
Кичик Дональд Трамп ва Беттина Трамп Путиннинг иттифоқчиси тўй тантаналарининг бир қисмини «совға» сифатида молиялаштирганини айтишди
Кичик Дональд Трампнинг рафиқаси Беттина Трамп уларнинг май ойида бўлиб ўтган тўйининг бир қисми Россия президенти Владимир Путиннинг иттифоқчиси томонидан молиялаштирилганини тасдиқлади.
Унинг Instagram аккаунтида эр-хотин номидан жойлаштирилган постда айтилишича, Багама оролларидаги хусусий оролда уч кун давом этган тўй тантаналарининг икки кечаси харажатлари қисман Путин билан яқин алоқада бўлган россиялик олигарх Умар Кремлев томонидан тўланган.
Ушбу баёнот душанба куни, ProPublica суриштирув нашри Кремлев тадбир учун «юз минглаб долларлик» харажатларни қоплагани ҳақида ҳисобот эълон қилганидан кейин пайдо бўлди.
АҚШ президентининг ўғилларидан бири бўлган Кичик Дональд Трамп хусусий шахс ҳисобланади, шу болис унинг чет эл фуқаросидан совғалар олиши қонунга хилоф эмас.
«Қадрли дўстимиз Умар тўйимиздан КЕЙИН биз учун икки кунлик ажойиб тантаналарни жуда саховатпешалик билан ташкил қилиб берди. Бу дўстимиздан жуда саховатли тўй совғаси бўлди ва бунинг учун биз ундан жуда миннатдор эдик ва шундай бўлиб қоламиз», — дейилади эр-хотиннинг баёнотида.
Шундай бўлса-да, одоб-ахлоқ қоидаларини назорат қилувчи ташкилотларнинг таъкидлашича, президентнинг ўғли АҚШ ҳукумати ходими бўлмаса ҳам, хорижий давлат раҳбарига алоқадор шахсдан қимматбаҳо совғалар қабул қилиши манфаатлар тўқнашуви кўринишини юзага келтиради.
«Одамлар шунчаки тасодифий танишига ҳеч нарса умид қилмасдан юз минглаб доллар бермайдилар», — деди Вашингтондаги Масъулият ва одоб-ахлоқ учун фуқаролар (CREW) ташкилотининг алоқалар бўйича вице-президенти Жордан Либовиц.
«[Путин] ўз даврасидаги одамлар президент даврасидаги одамлар билан яқинлашаётгани ҳақидаги ушбу матбуот хабарларидан қандай мамнун бўлишини тасаввур қилишингиз мумкин».
ProPublica ҳисоботига кўра, эр-хотин Багама оролларидаги хусусий оролда турмуш қуришган, сўнгра ижара ҳақи кунига тахминан 100 000 доллар турадиган бошқа бир оролда икки кунлик тантана ўтказишган. Ҳисоботда, шунингдек, Кремлев байрамнинг бошқа харажатларини, жумладан, тахминан 70 000 долларлик мушакбозликни ҳам тўлагани аниқланган.
Кремлев давлат томонидан қўллаб-қувватланадиган «Газпром» энергетика компанияси томонидан молиялаштириладиган Халқаро бокс ассоциациясига (IBA) раҳбарлик қилади. Олимпия қўмитаси ушбу ташкилот фаолиятини қисман Россия энергетика гиганти билан алоқаларини ошкор қилмагани сабабли тўхтатиб қўйган эди.
Шу йил бошида Кремлев Путин билан бирга Хитойга борган делегация таркибида бўлган. ProPublica, шунингдек, Россия президенти Кремлевни олий давлат мукофоти — «Дўстлик» ордени билан тақдирлаганини хабар қилди.
Кичик Трампнинг матбуот котиби нашрга президентнинг ўғли ва Кремлев шахсий дўстлар эканини ва улар ўртасида «бизнес алоқалари» йўқлигини айтди.
Кичик Трампнинг иттифоқчиси BBC'ни Инстаграм'даги баёнотга йўналтирди.
ПроПублиса'га берилган баёнотда Кремлевнинг идораси: «Жаноб Кремлев ва жаноб Кичик Трамп ўртасида дўстона муносабатлар мавжуд», — деб маълум қилди. Баёнотда айтилишича, икки эркак бир неча йил аввал учрашишган.
Нашрнинг хабар беришича, Кремлев тўйнинг бир қисмида иштирок этган. Меҳмонлар орасида АҚШ президентининг қизларидан бири Иванка Трамп ва унинг турмуш ўртоғи, АҚШ номидан Эрон, Россия ва Яқин Шарқ билан дипломатик музокараларда ишлаган Жаред Кушнер ҳам бўлган.
Трампнинг сайловолди кампанияси ва оиласи 2016 йилги президентлик сайловлари пайтида Россия билан эҳтимолий алоқалар туфайли синчковлик билан текширилган эди, бу эса махсус прокурор терговига олиб келган. Сайловолди кампанияси пайтида Кичик Дональд Трамп Trump Tower'да россиялик агент билан учрашув ташкил қилган ва бу учрашув тергов давомида батафсил ўрганилган эди.
CREW вакили Либовицнинг айтишича, миллиардер бўлган президент ёки Forbes маълумотларига кўра 300 миллион долларга эга бўлган Кичик Трамп ҳар қандай манфаатлар тўқнашувидан қочиш учун тўйнинг барча харажатларини ўзлари тўлашлари мумкин эди.
«Унинг отаси миллиардларга эга, у харажатларни ўз бўйнига олиши мумкин эди. Кўриниб турибдики, улар шунчаки бунинг учун пул тўлашни хоҳлашмаган», — деди Либовиц. «Улар одоб-ахлоқ оқибатлари ҳақида қайғуришмайди».