Кичик бизнес ва ўзини ўзи банд қилганларга микрокредит ажратиш кенгайтирилади
Кичик бизнес ва ўзини ўзи банд қилган шахслар учун микрокредитлаш имкониятлари кенгайтирилади. Ўзбекистонда микромолиялаш бозорида микрокредитларни кенгайтириш режалаштирилмоқда.
Президентнинг 28-августда кучга кирган фармонига кўра, Ўзбекистонда рўйхатдан ўтган кичик тадбиркорлик субьектлари ва ўзини ўзи банд қилган шахсларга 36 ойдан ошмаган муддатга микрокредитлар берилади.
Микромолия ташкилотларига мақсадли ва қайта тикланувчи кредит линиялари ажратиш, кредит портфелларини қайта молиялаштириш, кафолат тақдим этиш ҳамда техник кўмак кўрсатиш белгиланган. Бунда киритилган инвестициялар шартлари ва муддатлари Тадбиркорликни ривожлантириш компанияси томонидан белгиланади.
Шунингдек, компаниянинг асосланган буюртмасига биноан, Иқтисодиёт ва молия вазирлиги томонидан 2028-йилдан бошлаб ҳар йили Марказий банк асосий ставкасидан 4 фоиз паст ставкада бюджет ссудаси ажратилади. Бу маблағлар 3 йиллик имтиёзли давр билан 7 йил муддатга тақдим этилади.
Мазкур қўллаб-қувватлаш чоралари микромолия ташкилотлари, банклар ҳамда компания таъсисчилигидаги Микромолиялаш хизматларини ривожлантириш корхонаси томонидан амалга оширилади.
Кетма-кет икки йил давомида солиқ ва кредит мажбуриятларини ўз вақтида бажарган, иш ўринларини сақлаган ҳамда соф фойда билан якунлаган кичик ва ўрта тадбиркорлик субьектларига ўз лойиҳаларини амалга ошириш учун 120 ойдан ошмаган муддатга 5 миллиард сўмгача асосий ставкадан икки фоиз паст ставкада кредит ажратилиши ҳам белгиланган.