Кавказ тоғларида қор кўчкиси: қурбонлар сони ортмоқда
Россиянинг Кабардино-Балкария ҳудудидаги Безенги дарасида қор кўчкиси остида қолган алпинистлардан 11 нафари ҳалок бўлди. Яна олти киши бедарак йўқолган, уларни қидириш ишлари давом этмоқда.
Кавказ тоғларида қор кўчкиси: қурбонлар сони ошмоқда
Кабардино-Балкариядаги Безенги дарасида 6-сентабр куни қор кўчкиси юз бериб, бир гуруҳ алпинистлар унинг остида қолиб кетди. 7-сентабр эрталабки маълумотларга кўра, воқеа оқибатида 11 киши ҳалок бўлган, яна олти киши бедарак йўқолган. Бу ҳақда Россия Фавқулодда вазиятлар вазирлигининг ҳудудий бошқармаси хабар берди.
Аниқлаштирилган маълумотларга кўра, гуруҳ аъзоларидан ўн нафари хавфли ҳудуддан мустақил равишда чиқиб кетишга муваффақ бўлган. Яна олти киши турли даражада жароҳат олиб, тиббиёт муассасаларига олиб борилган.
Ҳозирда ҳодиса жойида кенг кўламли қидирув-қутқарув ишлари давом этмоқда. Уларга 56 нафар қутқарувчи ва мутахассис жалб қилинган. Бироқ мураккаб тоғ рельефи ҳамда янги қор кўчкилари тушиши хавфи қидирувни қийинлаштирмоқда.
Маълум қилинишича, қор кўчкиси 6-сентабр куни тахминан соат 17:00 да Мижирги тоғи ёнбағридан тушган.
Дастлаб Фавқулодда вазиятлар вазирлиги ҳодиса жойида 15 нафар алпинист бўлганини билдирган эди. Ўша пайтда икки киши ҳалок бўлгани, уч киши жароҳатлангани ва яна ўн нафар кишининг қаердалиги номаълум экани айтилган.
Кейинчалик маълумотлар аниқлаштирилиб, гуруҳда жами 33 киши бўлгани маълум бўлди. Қидирув-қутқарув операцияси давомида ҳалок бўлганлар ва жабрланганлар сони ҳақидаги маълумотлар ҳам янгиланди.
7-сентабр куни соат 09:00 ҳолатига кўра, 11 нафар алпинист ҳаёт билан мос келмайдиган оғир жароҳатлар оқибатида вафот этган. Яна олти кишининг тақдири ҳозирча номаълумлигича қолмоқда.
Об-ҳаво яхшиланса, бедарак йўқолганларни қидириш ишларига Россия Фавқулодда вазиятлар вазирлигининг Ми-8 вертолёти ҳамда «Хелиекшн» компаниясига тегишли тижорий вертолёт жалб этилиши режалаштирилган.
Ҳодисадан сўнг Россия Тергов қўмитаси эҳтиёцизлик ёки хизмат вазифаларига лоқайд муносабатда бўлиш билан боғлиқ модда бўйича жиноят иши қўзғатди. Терговчилар фожиа қандай шароитда юз бергани ва унга олиб келган эҳтимолий сабабларни аниқламоқда.
Шунингдек, ҳодиса содир бўлган ҳудудда ноқулай об-ҳаво шароити бўйича олдиндан огоҳлантириш амал қилгани қайд этилган.