Карни нефть қувури Канадага савдо урушида курашишга ёрдам беришидан умид қилмоқда
Ғарбий соҳилдаги қувур лойиҳаси тезлаштирилган тартибда амалга ошириладиган биринчи лойиҳа бўлди ва у Карнининг глобал инвесторларга берган ваъдаси учун жиддий синов бўлади.
Карнининг айтишича, нефть қувури Канадага савдо урушига бардош беришда ёрдам бериши мумкин
Марк Карни Канадани йирик энергия экспортчиси сифатида кўрсатишга интилмоқда
Бош вазир Марк Карни Канада Тинч океани соҳилигача бўлган 1250 км (775 миль) узунликдаги нефть қувурини тасдиқлашни тезлаштиришини айтди.
Карнининг таъкидлашича, Pacific Link лойиҳаси миллий манфаатлар учун жуда муҳим, чунки у Канадага нефть сотишни АҚШдан ташқарига ҳам кенгайтиришга ёрдам беради.
«Ғарбий соҳилга олиб борадиган қувур иқтисодиётимизни ўзгартириш, кейинги ўн йилликда АҚШдан ташқарига экспорт ҳажмини икки баравар ошириш бўйича миссиямизнинг бир қисмидир», деди у пайшанба куни.
Ушбу режа, шунингдек, у Канадани глобал энергетика «супердавлати»га айлантиришга ҳаракат қилаётган бир пайтда, Оттава йирик лойиҳаларни тез суръатларда олдинга сура олиши ҳақида глобал инвесторларга берган ваъдаси учун синов бўлиб хизмат қилади.
Бош вазирнинг сўзларига кўра, лойиҳа Канада ЯИМига йилига 30 миллиард Канада доллари (21 миллиард доллар; 16 миллиард фунт стерлинг) миқдорида маблағ қўшиши ва 140 000 иш ўрни яратиши кутилмоқда.
Карнининг айтишича, АҚШ Президенти Дональд Трамп томонидан жорий этилган протекционистик тарифлар фонида Канаданинг АҚШга иқтисодий қарамлиги заиф томонга айланди.
Ўтган йили Канада хом нефть экспортининг 90 фоизини жанубий қўшнисига юборган.
Pacific Link Брудерҳаймдан (Альберта) Дельта (Британ Колумбияси) яқинидаги чуқур сувли портга кунига тахминан бир миллион баррель хом нефть ташиш имкониятига эга бўлади.
Лойиҳа, шунингдек, икки миллион баррелгача нефть ташишга қодир бўлган кемаларни қабул қилиш учун мўлжалланган денгиз причалларини ҳам ўз ичига олади.
У ердан нефть денгиз орқали жаҳон бозорларига жўнатилади.
Оттаванинг билдиришича, ушбу лойиҳа Осиё-Тинч океани минтақасига, жумладан Жанубий Корея, Хитой ва Япония каби йирик бозорларга йўл очиш орқали Канаданинг АҚШга умумий қарамлигини тахминан 65-70 фоизгача камайтиради.
Pacific Link ўтган йили Либераллар ҳукумати томонидан тақдим этилган янги қонунга мувофиқ федерал тасдиқлаш ва тартибга солувчи органларнинг кўриб чиқиш жараёни тезлаштириладиган биринчи лойиҳа бўлади.
Мақсад — инвесторларга таклиф қилинаётган лойиҳа бўйича бир йил ичида якуний «ҳа» ёки «йўқ» деган жавобни беришдир.
Кучли қаршиликлар ва Канададаги лойиҳаларни кўриб чиқишнинг узоқ ва мураккаб жараёни илгари баъзи қувур лойиҳаларининг бекор қилинишига сабаб бўлган эди.
«Одамлар Канаданинг ушбу жараённи қандай бошқараётганини жуда диққат билан кузатишмоқда», деди ҳукумат расмийси пайшанба куни бўлиб ўтган ОАВ брифингида.
Уларнинг таъкидлашича, агар ҳамма нарса режалаштирилганидек кетса, қиймати 35,2 миллиарддан 43,7 миллиард Канада долларигача баҳоланаётган ушбу лойиҳага кўпроқ хусусий инвестициялар қизиқиш билдириши кутилмоқда.
Иккинчи умид шундан иборатки, Альбертанинг денгизга чиқиш имкони бўлмаган нефть конидан соҳилгача чўзиладиган ушбу қувур ўз ресурсларини ўзлаштиришдан узоқ вақт давомида тўсиб қўйилганини даъво қилаётган ғарбий провинцияни қониқтиришга ёрдам беради.
Альберта аҳолиси шу ой охирида мустақиллик бўйича референдумда овоз беради.
Pacific Link — «Канада қудратининг намойишидир», деди Карни Форт-МакМюррейда (Альберта) провинцияга бирор мурожаати бор-йўқлиги ҳақидаги саволга жавобан.
Қувур атроф-муҳитни муҳофаза қилиш гуруҳларининг, айниқса, унинг соҳилбўйи денгиз тизимига таъсири борасидаги хавотирлари туфайли, шунингдек, йўналиш бўйлаб жойлашган баъзи маҳаллий жамоаларнинг қаршилигига дуч келиши мумкин.
Карнининг айтишича, кўплаб маҳаллий жамоалар билан музокаралар аллақачон бўлиб ўтган ва ҳали олдинда «жадал» маслаҳатлашувлар кутилмоқда.
Агар якуний тасдиқ олинса, қурилишни 2032 йилгача бошлаш режалаштирилган.
Ҳозирги вақтда Канада ва Альберта ҳукуматлари, шунингдек, битта хусусий инвестор — Pembina Pipeline Corporation лойиҳани қўллаб-қувватламоқда. Ушбу компания қурилиш даврида 10 фоизлик улушга эга бўлиш ва қувур ишга тушгандан сўнг яна 10 фоизлик улушни сотиб олиш имконияти тўғрисида мажбурий бўлмаган битимга эга.
Маҳаллий гуруҳларга сотиб олиш учун камида 10 фоизлик эгалик улуши ҳам таклиф этилади.
Келишувнинг бир қисми сифатида, Альберта умумий чиқиндиларни камайтириш мақсадида дунёдаги энг йирик карбонат ангидридни тутиб қолиш дастурини қуришга рози бўлди.
Оттава, шунингдек, соҳилбўйида танкерлар ҳаракатининг кўпайиши натижасида зарар кўриши мумкин бўлган денгиз жонзотларини, жумладан, йўқолиб кетиш хавфи остида бўлган жанубий резидент қотил китларни (оркаларни) ҳимоя қилиш учун океанларни муҳофаза қилишни молиялаштириш ва қоидаларни кучайтириш чораларини кўрди.