Канада россиялик ҳоккейчиларни ёшлар ўртасидаги ЖЧга киритмайди — бош вазир Карни
Спорт арбитраж суди рухсатига қарамай, Канада Россия ҳоккей жамоасини ёшлар ўртасидаги ЖЧга қўймаслигини эълон қилди. Бош вазир Марк Карни Украинадаги уруш сабабли Россия ва Беларус спортчилари мамлакат ҳудудида ўтадиган ҳар қандай мусобақаларда қатнаша олмаслигини таъкидлади.
Канада россиялик ҳоккейчиларни ёшлар ўртасидаги ЖЧга қўймайди — бош вазир Карни
Канада Россия терма жамоасининг Алберта провинсиясида ўтказиладиган ҳоккей бўйича ёшлар ўртасидаги Жаҳон чемпионатида қатнашишига йўл бермайди. Бу ҳақда мамлакат бош вазири Марк Карни маълум қилди.
Карни Россия-Украина уруши давом этаётган бир пайтда Россия ва Беларус спортчилари Канадада бўлиб ўтадиган ҳеч қандай мусобақага киритилмаслигини таъкидлади.
“Агар сиз айнан ёшлар ўртасидаги Жаҳон чемпионати ҳақида сўраётган бўлсангиз, россияликлар у ерда бўлмайди”, — деди у (Реутерс иқтибоси).
Россиянинг Канададаги элчиси Олег Степанов Карнининг “сиёсатни ҳатто ажратиш эмас, бирлаштиришга хизмат қилиши керак бўлган ёшлар ҳоккейига ҳам олиб кираётган” баёнотларини “афсусланарли” деб атади.
“Оттава биринчи шайба ташланмасидан олдинроқ жиддий рақиблардан жуда эҳтиёткорлик билан халос бўлмоқда”, — дея қайд этди у.
Октабр ойи охирида Спорт арбитраж суди Халқаро ҳоккей федерацияси зиммасига Россия терма жамоасини халқаро мусобақаларда иштирок этишига рухсат бериш мажбуриятини юклаганди.
Ҳоккей бўйича нуфузли давлатларнинг катта қисми бу қарорни танқид қилган. Катталар ўртасидаги Жаҳон чемпионатига мезбонлик қилувчи Германия россияликлар иштирок этган тақдирда, турнирни ўтказишдан бош тортиши мумкинлигини билдирган. Швеция, Финляндия, Латвия, Норвегия ва Дания мусобақанинг ўзини бойкот қилмаслигини, бироқ Россия терма жамоасига қарши музга чиқмаслигини маълум қилган.
Ҳоккей бўйича ёшлар ўртасидаги ЖЧ 26-декабрдан 5-январга қадар бўлиб ўтади.