Канада Қирол Чарльз портрети тасвирланган янги 20 долларлик банкнотни тақдим этди
Вертикал банкнотада Қирол Чарлз III тасвирланган бўлиб, у 70 йилдан ортиқ вақт ичида Канада банкнотасида пайдо бўлган биринчи янги монархдир.
Канада Қирол Чарльз портрети туширилган янги 20 долларлик банкнотани тақдим этди
Вертикал полимер банкнота келаси йилнинг бошида муомалага киритилиши режалаштирилган.
Канада Қирол Чарльз III портрети туширилган янги 20 долларлик банкнотани тақдим этди. Бу 2022 йилда Қиролича Елизавета II вафотидан кейин, 70 йилдан ортиқ вақт ичида биринчи марта Канада банкнотасида янги монархнинг пайдо бўлишидир.
Банкнота пайшанба куни Канада Банки тадбирида тақдим этилди ва марказий банк раҳбари Тифф Маклем буни «жуда махсус кун» деб таърифлади.
Банкнотанинг ўзига хос хусусиятларидан бири унинг вертикал кўринишидир. Орқа томонида Канаданинг Иккинчи жаҳон урушидаги ролини хотирлаш учун Франциядаги Вими Риж мемориали тасвири жойлаштирилган.
Ҳамдўстлик давлатларидан Янги Зеландия ва Австралия Қирол тасвирини ўз тангаларига жойлаштирди, гарчи Австралия уни банкноталарга жойлаштирмаслигини маълум қилган бўлса-да.
Бунинг ўрнига, Австралия Қиролича Елизавета II тасвирланган ҳозирги дизайнни алмаштириш учун маҳаллий австралияликларнинг «маданияти ва тарихини» шарафловчи янги 5 долларлик банкнотани ишлаб чиқишини билдирди.
Канада Буюк Британиядан ташқарида Қирол монарх бўлганидан бери уни ўз банкноталарига жойлаштирган биринчи Ҳамдўстлик давлатидир.
Канада Банкининг маълум қилишича, банкнотада «Қиролнинг бутун умри давомида атроф-муҳитга бўлган садоқатидан илҳомланган» гул ва барглардан иборат нақш ҳам мавжуд.
Либерал депутат ва Канада Даромадлар агентлиги давлат котиби Уэйн Лонг тақдимотда банкнотадаги рамзлар «бизнинг миллат сифатида ким эканлигимиз ва нимани қадрлашимизни кучли эслатиб туришини» айтди.
Марказий банк баъзи элементлар маҳаллий аҳоли маслаҳат кенгаши билан келишилган ҳолда танланганини билдирди.
Бу Канадада чиқарилган иккинчи вертикал банкнотадир. Биринчиси қора танлилар ҳуқуқлари ҳимоячиси Виола Десмонд тасвирланган 10 долларлик купюра эди. Унинг дизайни кейинчалик 2018 йилда Халқаро банкноталар жамияти томонидан дунёдаги энг яхши дизайн деб топилган.
Маклем янги 20 долларлик банкнота келаси йилнинг бошида муомалага киришини айтди.
Сўровномалар шуни кўрсатадики, кўплаб канадаликликлар, айниқса француз тилида сўзлашувчи Квебекда, мамлакат Британия монархияси билан расмий алоқаларини тугатиши керак деб ҳисоблайди.
Бироқ, Канада ва АҚШ ўртасидаги кескинлик, жумладан, давом этаётган АҚШ-Канада савдо уруши ва АҚШ Президенти Дональд Трампнинг Канадани «51-штат» қилиш ҳақидаги баёнотлари фонида монархиянинг машҳурлиги бироз ошди.
Бош вазир Марк Карни май ойида Қиролни Канада парламентини очиб беришга таклиф қилди. Карни ўша пайтда бу ташриф «мамлакатимиз суверенитетини яққол кўрсатиб туришини» айтган эди.
Қирол Канада давлат раҳбари ҳисобланади ва Канадада унинг вакили генерал-губернатор Мэри Саймондир.