Канада прокурорлари Торонтодаги олтин ўғрилигида айбланаётган икки кишига нисбатан айбловларни олиб ташлади
Амит Жалота ва Али Разага қўйилган айбловлар олиб ташланди, 2023 йилдаги йирик ўғрилик билан боғлиқ бошқа ишлар бўйича суд жараёнлари эса давом этмоқда.
Канада прокурорлари Торонтодаги олтин ўғрилигида айбланаётган икки кишига нисбатан айбловларни олиб ташлади
2024 йилда Пил минтақавий полицияси ушбу ўғриликка алоқадор бир қатор ҳибсга олишлар ва айбловларни эълон қилган эди. Номлари тилга олинган икки кишига нисбатан айбловлар эндиликда бекор қилинди.
Канада прокурорлари 2023 йилда Торонтода содир этилган йирик олтин ўғрилигига алоқадорликда айбланаётган икки кишига нисбатан айбловларни қайтариб олди.
Ўтган ҳафтада Амит Жалота ва Али Разага қўйилган айбловлар бекор қилинди.
2023 йилнинг апрель ойида Торонто Пирсон аэропортидан қиймати 20 миллион Канада доллари (14,5 миллион доллар/11,6 миллион фунт стерлинг) бўлган 6500 дан ортиқ олтин қуймалари ва миллионлаб нақд пуллар олиб чиқиб кетилган эди. Бир йил ўтиб, полиция мамлакат тарихидаги энг йирик олтин ўғрилигига алоқадор бир қатор ҳибсга олишларни эълон қилди.
Иккала шахснинг адвокатлари Канада ОАВларига ўз мижозлари анчадан бери айбсиз эканликларини айтиб келишгани ва ниҳоят ўз ҳаётларини давом эттиришлари мумкинлигидан енгил тортишганини маълум қилишди.
Адвокатларнинг сўзларига кўра, қўйилган айбловлар уларнинг ҳаёти ва тирикчилик манбаларини остин-устун қилиб юборган эди.
Иккала эркак ҳам ўғирланган олтин ёки жиноятга алоқадор пул маблағларини сақлашда айбланаётган эди.
«У сўнгги уч йил давомида жиноий адлия тизими ва миллий ҳамда халқаро миқёсда оммавий равишда эълон қилинган ушбу айбловларнинг оқибатлари билан курашишга мажбур бўлгани сабабли асоссиз ва жазоловчи тарзда жабр кўрди», деди Жалотанинг адвокати Канада ОАВларига тақдим этилган баёнотда.
Ўғрилик аэропортдаги юк ташиш объекти ичида, юклар Швейцариянинг Цюрих шаҳридан Air Canada авиакомпанияси рейси билан етиб келганидан кейин содир бўлган.
Полициянинг таъкидлашича, кимдир сохта юк хатини — жўнатиладиган товарларга ҳамроҳлик қилувчи ҳужжатни тақдим этиш орқали юкларга кириш ҳуқуқини қўлга киритган.
Шундан сўнг, оғирлиги тахминан 400 кг (881 фунт) бўлган олтинни ўғирлаш учун юк машинасидан фойдаланилган, дейди полиция.
Шу йил бошида Канада суди томонидан бир киши ўғриликни режалаштиришга ёрдам бергани учун тўрт йилга озодликдан маҳрум этилган эди.
АҚШ Адлия вазирлиги маълумотларига кўра, яна бир киши АҚШда бошқалар билан ўқотар қуролларни ноқонуний айланмасига тил бириктирганликда айбини тан олганидан кейин 160 ойлик қамоқ жазосига ҳукм қилинган.
У Пенсильванияда полиция томонидан тўхтатилган, машинасининг юкхонасидан 65 та тўппонча топилган. Канада полициясининг таъкидлашича, қуроллар учун пуллар ўша олтин ўғрилигидан келиб тушган.
Яна икки нафар айбланувчи шу йил охирида ўғрилик содир этиш мақсадида тил бириктириш айблови бўйича алоҳида суд жараёнларига дуч келишади. Иккаласи ҳам ўзларини айбдор деб ҳисобламасликларини билдиришган.