К-рор юлдузи ҳарбий хизмат тўғрисидаги қонунни бузганликда айбдор деб топилди

K-pop юлдузи ҳарбий хизмат тўғрисидаги қонунни бузганликда айбдор деб топилди

Жанубий Корея суди K-pop хонандаси Сон Мин Хони мамлакатнинг ҳарбий хизмат тўғрисидаги қонунини бузганликда айбдор деб топиб, унга бир йиллик шартли қамоқ жазосини тайинлади.

Winner бойбэндининг 33 ёшли аъзоси 2023 йилдан 2024 йилгача ижтимоий ходим сифатида фаолият юритган Сеулдаги маҳалла марказида бир неча бор ишга келмагани аниқланган.

Жанубий Кореяда соғлом эркакларнинг барчаси камида 18 ойлик ҳарбий хизматни ўташи шарт. Бироқ, айримлар соғлиғи сабабли бунинг ўрнига ижтимоий хизмат вазифаларига тайинланади.

Пайшанба куни чиқарилган қамоқ жазоси икки йилга кечиктирилди (шартли деб белгиланди). Бу шуни англатадики, агар у ушбу икки йиллик синов муддати давомида ҳеч қандай жиноят содир этмаса, қамоқдан қутулиб қолиши мумкин.

Судда Мино саҳна номи билан ҳам танилган Соннинг ижтимоий хизмат ходими сифатидаги 21 ойлик фаолияти давомида 102 марта рухсатсиз ишга келмагани маълум бўлди.

Ҳарбий хизмат — бу «виждонан» бажарилиши керак бўлган бурчдир ва ижтимоий хизмат ходимлари ҳам «бундан мустасно эмас», деди суд.

Суд, шунингдек, Сон айбловларни тан олгани ва пушаймонлигини билдирганини айтди.

Маҳаллий ОАВ Соннинг ижтимоий хизмат вазифаларини тез-тез қолдиргани ва ҳаддан ташқари кўп касаллик таътили олгани ҳақида хабар берганидан сўнг, расмийлар 2024 йилда у хизматдан бўшатилганидан кўп ўтмай тергов бошлаган эди.

Соннинг ижтимоий хизмат марказидаги раҳбари ҳам унга ўз вазифаларидан қочишга ёрдам бергани, жумладан, Соннинг ишга келганини кўрсатиш учун ҳужжатларни сохталаштиргани учун шартли қамоқ жазосини олди.

Жанубий Корея санъаткорларининг ҳарбий хизматга чақирилиши узоқ вақтдан бери миллий жамоатчилик муҳокамаси мавзуси бўлиб келмоқда.

«Gangnam Style» ижрочиси Psy 2003 йилда ва яна 2007 йилда икки марта ҳарбий хизматга боришга мажбур бўлгани билан машҳур, чунки Сеул суди у биринчи ҳарбий хизмати даврида шоу-бизнес фаолиятини давом эттириб, ўз вазифаларини эътиборсиз қолдирган деб қарор қилган эди.

1990-йиллар ва 2000-йиллар бошида мамлакатнинг энг йирик поп-юлдузларидан бири бўлган Стив Ю 2002 йилда ҳарбий хизматдан бўйин товлагани аниқлангач, миллий можарога аралашиб қолган эди. Жанубий Корея расмийлари у ҳарбий хизматни ўташи керак бўлган вақтдан сал олдин фуқароликдан воз кечиб, АҚШ фуқаролигини қабул қилганидан кейин унинг мамлакатга киришини тақиқлаб қўйган.

Ҳарбий хизматни ўташ учун танаффус олиш Жанубий Кореянинг тез суръатлар билан ривожланаётган кўнгилочар индустриясида янги бошланаётган карьера учун кўпинча хавф сифатида кўрилади. Аммо ҳарбий хизматдан қочиш ҳам жамоатчиликнинг қаттиқ назорати ва ҳуқуқий оқибатларга олиб келади.

Пайшанба кунги ҳукмдан олдин Сон журналистларга қилган ишидан пушаймон эканини ва «унга шунчалик катта меҳр берган одамлардан узр сўрашини» айтган, деб хабар берди Seoul Economic Daily.

Бироқ, у мажбурий бурчни бажариш учун қайта хизматга бориш-бормаслиги ҳақидаги саволга жавоб бермади.