ЖАРлик ёзувчи аёл китоблар ва СИ ёрдамида қандай қилиб бир миллион доллар ишлаб топгани ҳақида сўзлаб берди

ЖАРлик ёзувчи романлар яратишда сунъий интеллектдан фойдаланиб, 2026 йил бошидан буён бир миллион доллардан ортиқ даромад олганини маълум қилди. Унинг сўзларига кўра, 2025 йилнинг февраль ойидан бери у 371 та китоб нашр этган ҳамда электрон, босма ва аудио форматда бир миллиондан ортиқ нусха сотган.

Корал Харт тахаллуси остида ижод қилувчи муаллиф бу ҳақда AFP агентлигига сўзлаб берди. У асосан романтик проза жанрида ёзади ва матнларни генерация қилиш учун бир нечта СИ-моделларини қўллайди.

Хартнинг таъкидлашича, китоб яратишда у сюжет, стиль, персонажлар характери ва боблар тузилишини ўзи белгилайди, сўнгра матнни генерация қилиш учун ChatGPT, Claude ва Grok'дан фойдаланади. Бундан кейин қоралама нусха СИ ёрдамида бир неча босқичли таҳрирдан ўтади, якунда эса уни корректор текширади.

Нейротармоқларга ўтишдан олдин Харт 14 йил давомида нашриёт соҳасида ишлаган ва бир неча ўнлаб асарлар ёзган. Унинг таъкидлашича, СИ-воситаларини ўзлаштириш ва шахсий иш тизимини йўлга қўйиш тахминан уч ой вақт олган. Ҳозирда у бошқа муаллифларга ҳам ўз усулини ўргатмоқда ва СИ ёрдамида китоблар яратиш учун Authorythm дастурини ишга туширишга тайёргарлик кўрмоқда.

Шу билан бирга, унинг фаолияти профессионал муҳитда баҳсларга сабаб бўлмоқда. Харт "СИ-слоп" — нейротармоқлар ёрдамида яратилган паст сифатли асарларни тарқатганликда танқид қилинмоқда. У ўн минглаб ҳақоратли хабарлар ва бир нечта ўлдириш билан таҳдидлар олганини айтди.

Танқидларга жавобан муаллиф сотув ҳажмига ҳавола қилади ва агар китоблар ёмон бўлганида, китобхонлар уларни қайтариб берган бўларди, деб ҳисоблайди.

Олдинроқ OpenAI нейротармоқ томонидан ёзилган контентни аниқлашни осонлаштириш учун ChatGPT ёрдамида яратилган матнларга кўринмас сув белгисини жорий қилишни режалаштираётгани хабар қилинган эди.