Жанубий Кореяда маҳаллий такси ҳайдовчисини калтаклаганликда гумонланиб, Ўзбекистон фуқароси қўлга олинди
Жанубий Кореяда маҳаллий таксичига ҳужум қилишда гумонланиб, Ўзбекистон фуқароси қўлга олинди
Жанубий Кореянинг Хвасон шаҳрида 30 ёшлар атрофидаги Ўзбекистон фуқароси 50 ёшли маҳаллий таксичини шафқатсизларча калтаклашда гумонланмоқда. Ҳодиса 18 октябрь куни Хянгнам туманида юз берган.
Ҳуқуқ-тиртибот органлари маълумотларига кўра, гумонланувчи ўзининг шахсий автомобилида ноқонуний равишда йўловчи ташишга уринган. Маҳаллий таксичи бунга халақит беришга ва қоидабузарликни камерага олишга ҳаракат қилганида, ҳайдовчи унинг ияк қисмига урган. Оқибатда жабрланувчи ҳушини йўқотиб, ерга йиқилган. Кузатув камералари ёзувларида ҳужум қилган шахс ҳушсиз ётган одамни қўллари ва оёқлари билан уришда давом этгани, шундан сўнг биринчи ёрдам кўрсатмасдан воқеа жойидан қочиб кетгани кўринган.
Корея полицияси видеоёзувларни таҳлил қилиш орқали 22 октябрь куни гумонланувчининг шахсини аниқлади. Яқин орада у расмий сўроққа чақирилади, жабрланувчининг тиббий хулосаси натижаларини инобатга олган ҳолда эса билдирилган айбловлар оғирлаштирилиши мумкин.
Маҳаллий ҳуқуқ-тиртибот ходимларининг таъкидлашича, Хвасонда Telegram мессенжери орқали ташкил этиладиган ноқонуний йўловчи ташиш амалиёти кенг тарқалган. Жорий йилнинг май ойида шу каби ноқонуний фаолият билан шуғулланган 29 нафар чет эллик, шу жумладан ўзбекистонликларга нисбатан қўзғатилган ишлар прокуратурага топширилган эди. Йил охиригача полиция ва иммиграция хизмати ноқонуний ташувларнинг олдини олишга қаратилган қўшма текширув ва назорат рейдларини кучайтиришни режалаштирмоқда.